Da tloth naqlat sim şalyuthzayno beyn Armenya u Azerbaijan

Athmıl bıthır ma bazare dsimi b’Waşington, i wazirutho di baroyutho d’Amerika mawdacla d’Armenya u Azerbaijan matın l’awyutho cal şalyuthzayno hathto dmafito la haye adyawma safrayto.

 İ şalyuthzaynathe cıl mıdkıtyo da tloth naqlat dıkmisomo bayn Armenya u Azerbaijan, adyawma safrayto atre gabe naqla hreto thımlın hdode bu tworayda.

 Bıthır mi ytawto dhawiwole Mayk Pompeo cama wazire da tıre athrawotho d’Armenya u d’Azerbaijan bi mditho d’Waşington, i wazirutho di baroyutho d’Amerika mawdacla da tıre gabe matın l’awyutho cal şalyuthzayno hathto noşoyto dmafito la haye adyawma 26 bu yarhano bi şuctho da 08 u 30 qatinotho d’safrayto bu qlimo d’Nagorno Qarabax.

İ şalyuthzaynathe bıthır mıdşafıc kımo şoce acla azayo hol darğo laf hrowo, cal da tıre gabe Armenya u Azerbaijan naqla hreto thımlın hdode bu tworayda. İ wazirutho du sutoro d’Armenya bi maqırhonutho dhula lu tboco froso, mawdacla da haylawotho d’Azerbaijan cal grube folhoye bi xasra du tayman madınho d’Qarabax, u makadlaste da haylawotho Azaroye mhelın soruho mu şıkıl d’Samirtaş cali qritho dıknıflo hedor di mditho d’Martoni.

Adyawma safraytoste bi şuctho da 08 u 45 qatinotho, Yerivan thımla i şultonutho d’Bako bu hjomo ba topat cala gbine du qrobo du garbay madınho du gayso d’Qarabax. Camgabıdathe, u rişwazire d’Armenya Nikol Paşinyan bi maqırhonutho dıfrısle bi dafayde du Twiter, mawdacle du athrayde gıdnofıq moro b’şıkıl kamilo li şalyuthzayno dımbayno b’Waşington.

Megabo hreno, Azerbaijan thımla Armenya dıtwırla b’şıkıl rabo i şalyuthzayno b’Qarabax, elo lımwadacla mışkıl Yerivan u ayko twırla i şalyuthzayno.

Mxasra hreto, u grub d’Minsk dkıtyo masro camu tukoso di mşaynutho u di methcadronutho d’Urifi udıkmişakıl ma nathrawotho dı Fransa, Rusya u Amerika mawdacle dgıdsoyım knuşyo hatho bu siqumo d’29 bu yarhano, bnişo dıdorış i sbutho du kriz d’Nagorno Qarabax.

U waziro di baroyutho d’Rusya Sergey Lavrov, mawdacle du athrayde mqabıl du şroyo folhoyo du kriz d’Qarabaxyo u mırle “ahna lıksındina a’mkone du şroyo folhoyo, dilonoyith da tıre came d’Armenya u d’Azerbejan hawrone u ahunonene laşanayna”.