07/04/2021

Dayroyo Aho Bileçen hkim lı tarte ışne u yarho hbuşyo

U dayroyo di dayro d’Mor Yahkub d’Qarno du turo d’İzlo Abuna Sefer Aho Bileçen, mçaze tarte eşne u yarho hbuşyo, ma thome di asirutho dcami marhıbonutho.

U bethdino d’Turkiya naqala hreto mahwele u gawno dkıtle di şultonutho du athro i siyase dkıbco kmaşyo cala şutose kulle.

İ siyase cçıqto dıkmaşyo i şultonutho du rişqutno Turkoyo Erdoğan mqabıl da zedqe da came tawdithoye u etnikoye du athro, nafiqo naqla hreto b’qrihutho li holo. Adyawma u dayroyo d’Mor Yahkub du turo d’İzlo di cito Suryoyto Orthodoksoyto Abuna Sefer Aho Bileçen, hkim 2 eşne u yarho hbuşyo.

U hawbo dıkmıthım u dayroyo ebe’ste, cal dhuwole muklo la haylawotho di PKK  dımhewolın bu tarco di dayrayde ba 2018’yo cal dkıtwın kafine. Ba 2020’ste msıkwo u dayroyo zabno leşan dmisım buqore acme bhaq da thomani.

U dayroyo adyawma lo hadırwo bu bethdino b’Mırde elo u sniğrayde hadirowe ubu fusqono dqrele u dayono, mawdacle d’Aho Bileçen mçaze cal dımcadarle tukoso marhıbono. Bu fusqono dhule u bethdino, fsiq dmitahwe lu dayroyo 2 eşne u yarho hbuşyo. U dayroyo msıkwo cam 10 farsufe hrene 9 bu yarho d’Konun u haroyo da 2020 elo 14 bu yarho marfewo naqla hreto cal d’rfıdwole a thome.

Bi sbuthathe u tboco froso du athro d’Turkiya ste frısle u tebano du dayroyo Bilecan dıhkim tarte ışne u yarho, i celtho dkıtyo 2 eşne u yarho lfuth u qonuno du dino d’Turkiya inaqa dhowe u hbuşyo zıttır me tarte ışne laybi mişahlıf l’Zuze awste dmisim ğer şuhlofo, star men du bethdino dcelaytır dkibe mşahlafle. Bi mawdconutho dmıdla ma sniğre du daytoyo mawdaclın dıg mawsqi i sbuthathe lu bethdino dlalcıltır d’Turkiya metul du thomano latyo şrolo.

U dayroyo mawdacwole dhiye xıd mathlono di mşihoyutho wolithoyo acle dımcawın kulman dı tolıb mcadronutho du muklo mi dayro. Bi sbuthathe u  folitiqoro qlimoyo du cameydan Aday bethkınne bi maqırhonutho dıfrısle bi sbutho du dayroyo Aho Bileçen tlıble mu rişwazire du Swed Stefan Löfven u mi wazırto di baroyutho du Swed dımdaxli li sbuthathe u dsaymi hboso cal Turkiya dmaqimo u thomo dkito calu Dayroyo Aho dbe bzabno kowe thomo cali cito kula.

Check Also

Adam Schiff tlıble me Biden dmawde bu qtolğenso da 1915

B’egartho ftıhto dımşadarle u hadomo di kongre d’Amerika dkıtyo mu gabo da Demoqratoye mi …