Dayroyo Samuel Özdemir dacır li cito Suryoyto Ortodoksoyto

Abuna Dayroyo Samuel Özdemir rushmoyith dacır li cito Suryoyto Ortodoksoyto. B’egartho ruşmoyto dmatile abuna Samuel Özdemir mu fateryarxo di cito Suryoyto ortodoksoyto, mawdıc ele dmaqbılo i egartheyde ukibe xodım bi cito Suryoyto Ortodoksoyto. Bıthır me teşmışto dhamşi eşne bi mdabronutho di cito Suryoyto Qatholiqoyto, abuna Samuel dacır li cito Suryoyto Ortodoksoyto.

Abuna Dayroyo Samuel, bi şato dan 1963 l’wışle u eskimo di dayroyutho xıd şamoşo Ewangeloyo cal ide du mnohnafşo Mor Filoksinos Yuhanun Dolabani.

Bi şato dan 1967 friş me celotho mşahılfotho mi dayro du Zacfaran wazze l’Lebnon. Utamo bi dayro d’Şarfe, masrıh dayroyo kohno cal ide d’Mor Griğoriyos Afrem JarJur. Umi naqlayo ruşmoyith bdewole dfolıh wıdxodım i cito Suryoyto Qatholiqoyto dkımrayşanla adyawma Mor İğnatiyos Yusuf Tlithoyo Younan.

Camu neqoyo wu ytowo d’Mor İğnatiyos Afrem Trayono calu kursyo di fateryarxutho di cito Suryoyto ortodoksoyto wa fulhone dsımle, Abuna Dayroyo Samuel mıdle jasara dımhalıq dawse leşan u dcoro. Ubi netice da ytawyotho udu mahwo şqolo dhawi bi wasita dsayyıdna uhasyo Mor Diosqoros Benyamin Ataş, abuna dayroyo Samuel bı 11 Konun u haroyo dadşato kıthuwle egartho ruşmoyto lu fateryarxo. Bi egartheyde dayroyo Samuel, mawdacwole u mabceyde u kamilo wu fusqono kamilo dkıtle leşan dıdocır li cito Suryoyto Ortodoksoyto dkıtyo i emeyde umırle:

“Ba zabne haroyani hzeli u jahd wu fulhono rabo dıksaymitu xıd abo ruhonoyo li cito Suryoyto u dlo kloyo dıkkurxitu udıkzayritu a marciyothathxu. Umıdli jasara mu medano uhuwli fusqono dkothawnolxu ruşmoyith dkobacno dıdocarno li cito Suryoyto ortodoksoyto dkıtyo i emeydi iqameyto. U ida dhozitu layıq, kobacno mıcdo wazolo dxodamno fayış tahti mdabronuthathxu i hakımto.”

Sayyıdna u fateryarxo Mor İğnatiyos Afrem II. 29 bu yarho dı Şbot da dşaficina, b’egartho dı mşadarle l’abun Dayroyo Samuel, madcarle funoyo acle. Bi egartheyde fateryarxo Afrem II. hawxa komır:

“Bıthır mıd hrıglan bı rwihutho u braficutho cali egarthathxu wa sebwotho dkıtne masre bi teşmeştathxu i citonoyto mi naqla dkıtwoxu bi dayro du Zacfaran uhol lucdo, lo hzelan dkito msombrişo jaza gabeyna bi cito mqabıl didox, u lo dışxu a thume wa qonune di cito ulostene şamicina dmaşkelox aw dımhelox bi cito. A medonani kulle mathnahlın lebeyna wu sebyoneydan. Calathe leşan u iqoro di teşmeşteydox masrahlalox tıre qaşe kohne. Ukıbcina dmawdıcinalxu, kmaqıblinalxu dayroyo kohno bi cito Suryoyto ortodoksoyto u mdabronoyith gıddowitu masire baroyo bi fateryarxutheydan. Ktulbina meneyxu dhowitu maticone li mdabronutheydan.” 

Cami egartho wu fusqonano d’Mor İğnatiyos dımşadır la hsayo hadome di sunedus di cito Suryoyto ortodokyto, Abuna Dayroyo Samuel Ozdemir ruşmoyith dacır li cito Suryoyto ortodoksoyto.

Walaw abuna dayroyo Samuel masrowe mdabronoyith bi cito Qatholiqoyto, elo a fulhone wi teşmeşteyde li Mşihoyutho kulawa u furşono lıkosoyamwo. U bkul munasabe ha hozewole beyn du camo Suryoyo dlo furşono.

Heş bu zabno du mnohnafşo Mor Yuliyos Yeşuc Çiçek, ba 2004 mçarabwole dmadcır abuna dayroyo Samuel li cito Suryoyto. Elo uşunoyeyde maklewole umabcano dide.