A haylawotho d’Amerika u du Nato gıdmıgroşi me Afğanistan

A hayle Amerikoye wa hayle du NATO, mbayanlın u zabno du groşathe mu athro d’Afğanistan. Mawdıc du groşo da haylani me Afğanistan, kibe dothe dhowe bı zabno d’14 yarhe.

 Bebzabno Woşington wu zawco da Talibanoye, mdelın athmıl calu ittifaq di şalyuthzayno, bıthır 18 eşne dı qrobo mqabıl dhıdode.

Hem i şultonutho d’Woşington u hemste i şultonutho d’Afğanistan mawdaclın, du groşo da hayle Amerikoye udan athrawotho hadome bu huyodo du NATO, kibe dothe dhowe bı zabno d’14 yarhe. Ba maqırhonwotho dıfrisi ma 2 şultonwotho bi sbuthathe mawdıcste, d’Amerika gıdımşaryo dmanqıso a folhayda l’8.600 folhe.

U groşano da folhe gıdmisım bıthır me 135 yawme mu zabno dımde u qyomo du şlomo beyn Woşington udu zawco da Talibanoye. Mawdıc d’Amerika masırtoyo bu talabayda, dmitahwela kmoyutho d’zuze kull şato leşan dımdarşo a hayle di mşaynutho d’Afğanistan u dobolın lojistik u zayne.

Ba maqırhonwothaniste, a 2 şultonwotho bı qrihutho m’akadlın, d’Amerika masırtoyo bu şudoyayde dımtabqo u ittifaqano hol da Talibanoyeste dsaymi cayni mede. Athmılste, a taşdaryotho d’Woşington uda Talibanoye, mdewolın u qyomo du şlomo leşan dmitakle u qrobano dıkmdawım hani 18 eşne beynothaye.

Luqyomanoste dımde bi arişkoyto d’Qatar-Dawha, hadırste u waziro di baroyutho d’Amerika Mike Pompeo. U qyomano mde, bıthır şabtho d’şalyuthzayno beyn da folhe Amerikoye uda hayle da Talibanoye b’Afğanistan. Athmılste, hawile u waziro du sutoro Mark Esper socurutho li arişkoyto Kabul, leşan dmode qyomo cami şultonutho Afğanoyto.