Dayroyo Samuel Özdemir frısle egartho du Cedo di qyamto

U kohno di cito Suryoyto Ortodoksoyto Abuna dayroyo Samuel Özdemir, mcayadle u cedo di qyamto du cameydan u di Mşihoyutho kula.

 Bi egartho dıfrısle Abuna Samuel, tlıble mu camo dımsaybır bu maşıqlano u casqo wıdmahıt bolo calu hulmoneyde.

Bi cohnutho du cedo di qyamto d’Moran Yeşuc Mşiho, abuna dayroyo Samuel Özdemir mcayadle ucedo du cameydan udu cılmo Mşihoyo kule. Mu beth qomeyde dkıtyo bi dayro d’Şarlowa, Abuna Samuel bu mesajeyde du cedo komır:

“Bu rişo qamoyo kımcayadno ucedo di qyamto d’Moran Yeşuc Mşiho lu Fateryarxeydan Mor İğnatiyos Afrem II, la hsayo abohotho di sunadus qadişto, la dayroye, la xuroye, la qaşişe ula mşamşone u mşamşonyotho brixe ulu camo Suryoyo kule. Bzabno casqo kımcaydina ucedo di qyamto du moreydan. Bzabno a citotho dkıtne sxire ukul ha menan dkıtyo casyo bu bayteyde. Elo kıtli sabro dgışıfcina u zabno casqano dımşalatle cal britho mfothe du virus di Corona.”

Abuna Dayroyo Samuel dıtlıble mu camo dımsaybır u dımtahmıl i casquthathe, hawxa mdawamle:

“U Virusano di Corona, hawi qento bı britho kula. Udilonoyithstene kqotıl a bnaynoşo dkıtne bcımro rabo a sowe. Mawxa klozım dmaydina a tedbireydan udımhamina ruheyna. Mjarebu dmistafditu mu zabnano dmolitu uzabnathxu bu yulfono ubi qraye du kthowu qadisho uda haye da qadishe. Onostene bu zabnano lo qadırno dmıstaqbalno noşe u mhaymıne dabici dothın zayrili wıdkıtwın sniqoye elan. Elo lo tacinolxu. Ukul yawmo ba slawotho uba dıcwotheydan kmathkarnolxu. Ukımsaleno d’Aloho dımhase a canide mhaymıne dınqili calu sabreyde mu cılmano. Mu sabab i haymonutheydan xıd dmırle Fawlus u Şlihoyo. “Mithe d’Bamşiho, mawto lo Tocmin”. A mithe d’Bı Mşiho mawto lıktıcmi uqulnaqla hayene sağ ne.”

Abuna Dayroyo Samuel dıgrışle uzuhoro calu lebo mrahmono wi ido ftıhto dkıtle ucamo Suryoyo, tıhkırleste i lamme di mcadronutho dsimolan xıd SuroyoTV leşan u athro uhawxa mdawamle:

“Ba yawmothani a mahşone wa catume, kowestene medone dıkmabhıri a hayeydan. Xıd mathlo kobacno dobeno u teltimo di mcadronutho dsımle SuroyoTV leşan u cameydan u sniqoyo b’Lebnon u Suriya. Bhawxa zabno mahwele, u cameydan u Suryoyo mıqqa lebe brahmeyo u dlo taci an ahunone u ahwotheyde dkıtne sniqoye bu athro. Kobacno dımhaneno SuroyoTV bu mede dsımle udımqadamno a tawdiyotheydi lkul ha menan dqadır dımcadır wıdsonıd anahunone u ahwotheydan bu zabnano di sniqutho. Onostene hadirono wıklozım dsundina anahunone u ahwotheydan u SuroyoTV. İnaqla dkımcawnina SuroyoTV lruheyna kımcawnina ulu cameydan kımcawnina. Adyawma dlowewo SuroyoTV, i mcadronuthathestene lıklıtmowa. Aloho mbarex acleyxu uba hayathxu.”

Hathe inaqla qameytoyo Abuna Samuel, bıthır mıd dacır li cito Suryoyto Ortodoksoyto dıkforıs egartho du cedo wıdkımcayıd ucamo wa mhaymıne.