25/11/2020

Denho Gök mu virus di Corona mhase

U virus Corona, kımdawım dımşalıt haşo ba bote du cameydan. Maqedşoyo Denho Gök mi iqartho d’Be Abın, athmıl mu virus di Corona nqil ma hayani.

 Bebzabno Maqedşoyo Barsaumo Ok u abro du Hanno Be Şımme mhasele mi corona. Maqedşoyo Barsawmo dmawladwo bi Sare, ma Suryoye qamoye dathiwo l’Almanyawe. Yidicowe ba mcadronwotho dkobewo.

Maqedşoyo Denho Gök Be Abın, coyaşwo b’Bebra d’Almanya u ba yawmotho dşaficina tafiwole u virus di Corona u nqılwo li bethkrihe di mditho. Maqedşoyo Denho Gök mi iqartho d’Be Abın, mawladwo ban 1947 bi qritho d’Bsorino me Abohe Abdullah u Basse Gök.

Ban 1969, mhayadle a hayeyde cami bathzawgeyde Yildiz Ersoy me Hapsis umu zuwoğano hawilın 2 abne u 6 bnotho u 25 nubğe. Ba yawmotho haroye mıqa dhuwle ağuno mqabıl du kewoste, lo qadır dxolıs mene. U athmıl bi bethkrihe d’Bebra bcımro d’73 eşne nqil ma hayani.

U mhasyo u ahuno du hawro Nuri Gök Be Abınwe dkıtyo ma hadome u ma sanode du fulhono u du ağuno umthoyo u du froshezwo d’SuroyoTV. I slutho du cufoyeyde, 27 bu yarhano bi mditho d’Bebra d’Almanya gıdmisım.

Me gabo hreno maqedşoyo Barsawmo Ok dıkmidacwo u abro du Hanno dBe Şımme, mawladwo ban 1940 bi qritho di Sare. Ban 1969 azzewo l’Almanya u rakuwo b’Ochsenfurt. Kıtwole 9 nacime 4 abne u 5 bnotho.Yidicowe dhawiwo u mşatsono di cito d’Mor Malke ban 1991 b’Ochsenfurt d’Almanya. Farsufo mcadrono u rahomo da xeratwe.

Mşamhowe, kul şato dkızewo bi radeyteyde me Almanya u holi Sare. Meqım hedor 10 yawme tafile u virusano u nqılwo li bethkrihe. U abreyde Shamosho Evangeloyo Shemhunste dtafiwole u virusano, ucdo maxlasle wi aykanoyutheyde tawtoyo. Elo u maqsi lo qadır dğolıb u virusano u athmıl bi bethkrihe nqil ma hayani.Yawme d’Tre 30 bu yarho gıdmisım u cufoyeyde bi cito d’Mor Malke d’Ochsenfurt.