Emwotho Mhaydotho: 500 alfo galwoye daciri la dukothathe bıgawe d’Suriya

NEW YORK / DARIMSUQ – U Komisyon celoyo da Galwoye d’Emwotho Mhaydotho-UNHCR frısle athmıl taşroro u mawdacle, dhol falge d’milyon dıbnaynoşo daciri me ğer athrawotho la dukothathe b’Suriya mu zabno du nfolo du rejim catiqo uholudo, walaw heş kito ucdo şwole u qetre rabe bu athro. Lfuth UNHCR hol milyon u 200 alfo dıbnaynoşo dkıtwın galwoye bıgawe du athro, daciri la dukothathe ba kmo yarhani dnafıl u rejim catiqo d’al Asad.

Bu dcorano’ste mawdıc da galwoye kıloqın casqotho mi bsirutho da dairat ruşmoye xıdu hulmono, du yulfono, du fulhono udu quyomo. A şwolano dıkımşakli qetro li mlahmonutho da galwoye bıgawe du kenşo, kım’adıl cali sniqutho dkito dımdawım u kenşo Emwothoyo bu snodayde leşan u bnoyo du bınyono tahtoyo udu dcoro du camo la dukothayde b’Suriya.

Bebzabno waziro di galwoyutho du Swed Johan Forssell mawdacle, ucdo bıthır mıd i aykanoyutho d’Suriya kull dkothe kmicadlo, kımtayıb u Swed plan dmadcır a galwoye Suriye. Leşan i tahraztathe dfayto la haye, gıdmabde u Swed droşe cama athrawotho Urifoye hrene leşan dımşahli plan mşawtıfo bi sbuthathe. U waziro Forssell mawdacle, da Suriye kit dımvayci u zedqathe du fyoşo bu Swed, en dothe i aykanoyutho du athro dmicadlo u dmitaqimi a tedbire dmahtila Amerika u Urifi acle.

U waziro d’drışle i sbuthathe cam Danmark u mırle; En i aykanoyutho d’Suriya dımdawmi dmişawşıto bu dumyano, kmıtyaqanno dgıdowe mede kyonoyo dhowe mkono la Suriye dkıtne bu Swed ducri lu athrathe. İ aykanoyutho dkito ucdo beyn İsroyel u İran, lıkmıtyaqnina gıdm’athro calu dcoro da galwoye. Kito ucdo 20 alfo dacwat d’galwoye Suriye dlo qayıthlın barmothoyutho Swedoyto, dgımitadcıri.