TEL AVIV: Hawyo taglitho rabtho mqabil du rişwazire

Lfuth u polis İsarloyo, hol 130 alfo İsarloye mıştawtaflın athmıl li taglitho dsimo bi arişkoyto Tel Aviv leşan dsaymi protesto u plan dkıtle Benyamen Netanyahu dsoyım şuhlofo bu sistem di kinutho. A tagliyothani kımdawmi kull şabtho mqabıl di şultonutho hathto du athro. U camo kıtohım i şultonutho yaminoyto qşitho d’Netanyahu bu tehriwo di demoqratoyutho udu sistem di şaryutho da bethdine.

Tagliyotho hrene nacime simi’ste b’Urışlem, Haifa uğer dukotho hrene. Ba luhyotho dtcınlın a mtagliyone kthuwlın; Ahna kıruhmina u athraydan, gıdmhafdina i demoqratoyutho ubı luho hreto kthiw; Lo lu inqilab. Ha ma mtagliyone mawdacle i zuctho dıkcoyış, cala şuhlofani dkubco i şultonutho dsaymo leşan dımbayno a dayone bu darbo folitiqoyo.

Ğer’ste mırlın; Ahna kobina ağono leşan u athraydan ulu dactid da nacimaydan. U bethdino klozom dhowe şaryo wi demoqratoyutho lıkcawdo, inaqla da bethdine dlowın şarye u dmimıd u haylo menaye u dlo qudri dmahti klayto mqabıl d’qonune dkıtne saqıbloye du nomuso. Calathe lıgfayşina ahna b’belhude ba tagliyothani elo gıdmdawmina ba takliyotho da şuğlone uba rdufye.

İ şultonutho d’Netanyahu mşarewola bi wolithayda bi harayto du yarho dşafıcina u hawyo’wa i şultonutho qamayto bıthır 3 eşne, dmıdwola sagiyoyutho d’snodo. Lfuth u renyo da yaminoye d’İsroyel, hani zabno yarixo kmi’athri a bethdine du athro ma hayle semoloye liberaloye u calathe klozım dmişahlıfi.