Emwotho Mhaydotho mhanela u rejim d’Suriya calu futoho d’tarte thume hrene d’Suriya
U rişathro d’Suriya Başar al Asad maqbele dfotıh a thume du garbay macırbo du athro bnişo dmitacbır mcadronutho noşoyto lu camo sniqoyo dım’athır ma zalzalat dhawın’wo meqım şabtho. Calu fusqonano’ste, u notarozo gawonoyo d’Emwotho Mhaydotho Antonio Guterres, mhanele u rejim d’Suriya cal dfsıqle dmıftohi a tre thumani d’Bab al Salameh u d’al Rai dkıtne bu garbyo d’Holob.
Darımsuq maqbela d’Emwotho Mhaydotho dmacbıro mcadronutho noşoyto la dukotho du garbay macırbo d’Suriya. A tre thume d’Bab al Salame u d’Al Rai dkıtne cala thume dbeyn Suriya u Turkiya, gıdfayşi ftihe l’zabno d’3 yarhe, bnişo dqudri a tukose noşoye dmacbıri mcadronutho noşoyto lu camo sniqoyo.
Calu futoho da 2 thumani’ste, u notarozo gawonoyo d’Emwotho Mhaydotho Antonio Guterres athmıl mawdacle i fsihuthayde u mırle; Bu futoho da thumani gıdmitahwelan aftho b’surhobo dmacbırina mcadronutho noşoyto la dukotho dıklozım u lba milyone sniqoye. U cal qariwo gıdmşarena ba fulhonaydan lu qlimo.
U fusqonano d’al Asad mid, şabtho bıthır ma zalzalat dhawın b’Turkiya u b’Suriya u bıthır ma hbsoe Emwothoye dsimi acle-dilonyith bu zabno du knuşyo dsımwole u Mawtbo di Mşaynutho d’Emwotho Mhaydotho hani kmo yawme. Bebzabno, camgabe dmawdıc u mınyono da mithe ma zalzalatani dhawın, mawdıc’ste u husrono rabo dtrelın ba 2 athrawotho şbobe.
B’belhude b’Turkiya mawdıc d’shif 42 alfo bınyone b’dukotho frişe dım’athri mi zalzale. Camathe’ste mawdıc du husrono momunoyo dhawi b’Turkiya kımote l’84 milyare dolare ubi sbuthathe’ste, mşarela Turkiya d’thumo a farsufe wa şırak d’dışlın a qonune di cımare u tlib dmımsık 113 farsufe.
Putin hule şudoyo dgımdawım u fulhonayde leşan u sutoro da Mşihoye bu Madınho
U rişono d’Rusya Vlademir Putin bi maqırhonutho dhule lu tbocofroso, makadle dkobıc dımdawım bu …
