Emwotho Mhaydotho mzaharla d’Dacış me hatho dkımtakıs ruhe

Emwotho mhaydotho mzaharla a hayle d’Suriya du Iraq da marıhbone dı Dacış kımtaksi me hatho ruhaye, metul dkıbci mıstafdi mi fırsa dıbritho lbikoytoyo bu ağuno dımqabıl du kewo di Corona.

Bi maqırhonutho dilonoyith kmıgrış u zuhoro cal dukothe dkıtne bu duyoqo d’Turkiya xıd mathlo kmitahwe Maxmur bu İran Cafrin b’Suriya.

A furqoce wa hjome dkowın bu zabno haroyo bu garbiyo u bu madınho d’Suriya u bi xasra du Iraq bhın ma dukotho du qlimo d’Kurdistan du Iraq kıgurşi u zuhoro da marıhbone dı Dacış me hatho kımtaksi ruhaye.

Emwotho mhaydotho kmawdıco bu zabnano d’Britho şğimaytoyo bu kewo di Corona a marıhbone hzelın fırsa dımtaksi ruhaye me hatho du dsaymi hjome cala mdinoye u cala haylawotho dkıtne bu qlimo.

Bi maqırhonutho dıfriso mu mawtbo celoyo  da zedqe kmıgrış u zuhoro cala dukotho dkıtne bu duyoqo d’Turkiya wa dukotho dıksaymo qrobo bınne, xıd mathlo kobın u furqoco dhawiwo b’Cafrin meqım zabno, u be bzabno i fnitho d’Maxmur du Iraq dı Turkiya ksaymo hjome cala turone dkıtne a haylawotho di PKK.

U mşalo du mawtbo da zedqe noşoye d’Emwotho mhaydotho Michelle Başelet bi maqırhonutho dhule mırle. Ba dukotho d’Turkiya kıtla itifaqiye cama gurube da marıhbone Dacış kromız dımtakıs me hatho.

Hathe kuyo bu zabno da şıltonwotho wa mdabronwotho da dukothani lıbikoyene bahaye da bnaynoşo dımdafcıne mu kewo di Corona.