Emwotho Mhaydotho w uHuyodo d’Urifi m’ayadlen u fusqono dmıdle u gabo di PKK dışrele ruhe, u mawdaclen dkıtyo dawse hreto usloyto laf şroyo mşayno lu kriz yarixo

U malolo du notarrozo gawonoyo d’Ewmotho Mhaydotho Stefan Dojarik, m’ayadle u şudoco dsımle u gabo di PKK dmawdacle dışrele ruhe udımhalaqle u zaynayde, u mahwele ste sabro dhowe u fsuqonano şuroyo du maşıqlo du şroyo kamilo li sbutho Kurdoyto b’Turkiya. 

Bebzabno, Dojarik bi maqırhonutho dhule li şabake d’Rodaw mawdacle du kenşo emwothoyo klozım dmıçğıl b’ha qolo laşan du snodo du maşıqlo du şlomo, u mamtele ste lubolo di sbutho Kurdoyto qarutoyo mu lebo du notarrozo gawonoyo d’Emwotho Mhaydotho Antonio Guteres dsımwole meqım socurutho lu qlimo d’Kurdistan du Ciraq. 

Calu şuwolo dmın garanti emwothoyo kibe dmiqadım laşan du kuşoro du maşıqlo du şlomo bayn di PKK wu gayso dı Turkiya, Dojarik mırle “u şuwolano casqoyo dmifane acle, cal d’ahna latna taraf bu qyomo dsim. Ubu şıklano laybi dımbayano mın şıkıl d’garanti kibe dmiqadım. U mede dkibi dımarnole du kenşo emwothoyo klozım dsoyım u mede dkothe mene laşan du snodo du maşıqlano du şlomo, bnişo dmisım u garanti dlımihalıq dawsat laxalf, udhowe u maşıqlo b’şıkıl çıddi şuroyo laşan du şroyo d’ğalabe qetre u sebwotho”. 

Camgabıdathe, u komisyon d’Urifi m’ayadle a’fusqone du konferans da 12 di PKK u mawdacle dkıtyo dawse msimonitho lafu şuroro du şlomo bi fnitho. U malolo du komisyon Anwar Alcanuni mırle “u Huyodo d‘Urifi kmıtyaqın du tebdiyo d’maşıqlo du şlomo dkıtle u nişo dmiqafe şroyo siyasi li sbutho Kurdoyto, kibe dımmathıl dawse msimonitho lafu şuroro d’şroyo mşayno u aminoyo”. 

Mxasra hreto, i wazirutho di gawoyutho d’Almanya mawdacla di maqırhonutho d’Cabdalla Öçalan bi sbutho du tetimo du qrobo mqabıl dı Turkiya wu şudoco du gabo di PKK dışrele ruhe, latne makfiyone dmitawfıq u gabo mi lohitho di marıhbonutho.