Erdoğan kmaqşe i tuhmonoyutho Maşılmonoyto bgawıd du kenşo Turkoyo

U mdabrono du zawco folitiqoyo Mşihoye d’Urifi d’Sallux Yohannes De Yong, maglele liholo du rişono du rejim dı Turkiya Erdoğan, kmaqşe i tuhmonoyutho Maşılmonoyto bgawıd du kenşo Turkoyo dıkhoye bu athro d’Hollanda.

 De Yong bi mıştawtfonuthayde li tahrazto d’Şabtho Kamılto, mawdacle dımbarbızo tahwitho da n’istixbarat d’Hollanda, dıkmagılyo cala nesore dkito bayn d’Erdoğan udu zawco Maşılmono tuhmonoyo b’Hollanda.

U mdabrono du zawco folitiqoyo Mşihoye d’Urifi d’Sallux Yohannes De Yong, athmıl mıştawtafle bu darbo du Skayp li tahrazto d’Şabtho Kamılto dıkmiqadmo ma tre hawronaydan Yacqub Mirza u Metin Rhawi.

Bi tahraztathe, De Yong mawdacle du şutoso di mşaynutho udu nfoqo mqabıl di marıhbonutho d’Hollanda, maslamle tahwitho li şultonutho dıkmagılyo du rişono du rejim dı Turkiya Erdoğan kıtle esore camu teqşiyo di Maşılmonutho tuhmonoyto b’gawıd du kenşo d’Hollanda. İ tahwithathe kmagılyo ste d’Erdoğan kforıs i Maşılmonutho qşitho b’gawıd du kenşo Turkoyo d’Hollanda bu darbo da şutose u knuşyotho Turkoye dkito bu athrano.

Lfuth i tahwithathe dıkmişaklo m’30 warqe, atukose Maşılmone tuhmonoye dı Turkiya awkith a’tukose da Maşılmone Salafiye, kıtlın esore qawye cama şutose Turkoye b’Hollanda dilonoyith a’tukose di claymutho.

Bebzabno, De Yong mawdacle di tahwitho dıfrisi ma n’istixbarat d’Hollanda, kıgrışo u zuhoro cala n’esore dkowın bu darbo du nawlo bayn da şutose d’Erdoğan wa Maşılmone Turkoye qaşye b’Hollanda, u mathkarle da tre gabe kımşadri lıhdode egrotho dkıtne bceldboboye lu macırbo uli şimoyutho.

Bi tahwithathe dıfriso bu ışmo “u stratiji d’Erdoğan lafi Maşılmonutho”, kmıgrışıste u zuhoro cal Erdoğan dhule aftho rabtho la Maşılmone tuhmonoye d’ruhi b’Turkiya, bnişo dmaqwe i şultonuthayde wu haylo dkıtle b’gawıd du athro.

Camgabıdathe, De Yong mawdacle di tahwitho kımşalto ste bahro cala nesore dkıtla Turkiya cam grube marıhbone mbayne, baynothaye u gbino d’Alnusra awkith a’çatawiye du tukoso dı Tahrir Alşam b’Suriya.

A’rişone folitiqoye d’Hollanda wu şutoso da nistixbarat du athro, bu nuholaththe li tahwitho, kmasri u qedomo d’Erdoğan camu hçomo marıhbono dhawiwo bi mditho d’Otrixt b’Hollanda i şato da 2019. Bu hçomano, u barmothoyo Turkoyo Gökman Taniş ba buğre dmarsıwole qtiwole 3 farsufe u mçarahwole 7 hrene b’Otrixt.