Friso i netije da furqoce dhawi bu athro d’Lebnon

U gayso d’Lebnon, frısle i netije da buhone dsımle calu husrono dhawi bi arişkoyto Beyrut, bıthır mu furqoco qaşyo dhawiwo 4 bu yarho d’Ob dı şafıcina.

 Lfuth u taşroro difrısle u gayso, hol 85 alfo bınyone di mditho hzelın husrono  ma furqocani.

Bi maqırhonutho difrısle u gayso d’Lebnon mawdacle i netije du buhono dsımle calu husrono trele u furqoco qaşyo dhawiwo bu lmino d’Beyrut bu şuroyo du yarho dı şafıcina. Bu buyonano mawdıc, dhol 85 alfo 744 bınyone frişe di mditho, hzewolın husrono.

Ban alfayo d’tonat d’ammonium nitrat dkıtwe b’cambar bu lmino, mfarqacwo bu lmino d’Beyrut 4 bu yarho d’Ob dı şafıcina, ubi netije qtılwo 190 bnaynoşo uban alfayo dhreneste mjarhiwo wu huwo husrono rabo li arişkoyto. Bebzabno u gayso mawdacle dheş kıkurxi cal 9 farsufe 3 Lebnonoye, 5 me Suriya u ha Mısroyo dkıtne mvayce.

U gayso rızle i netijayde u mırle; Beyn da bınyone dishifi kito; 60 alfo 818 bote hzewolın husrono, 19 alfo 115 dukotho da şuğlone, 1.137dukotho  catiqe, 962 resturange, 82 madraşyotho, 12 bethkrihe uğer. U gayso mawdacleste ğer husrone dhawın xıd mathlo 108 alfo tarce u ba mo alfayo d’şubake hariwi.

İ netijathe du gayso gıdmitıstacmılo bu lumodo Emwothoyo dgımisım leşan i mcadronutho d’Lebnon. 9 bu yarho dı şafıcina, malımwola Fransa u Emwotho Mhaydotho hol 250 milyone euro me athrawotho u tukose frişe, leşan u snodo du athro. Bu yarho dıbqamuthaynaste gıdmitayıb lumodo Emwothoyo hreno leşan i mcadronutho d’Lebnon.