Erdoğan tlıble mcadronutho da zuze ma waqfat da qalilotho

Erdoğan sımle naqa hreto mede bhefxo u tars da şıltonwotho dıksaymi mıhlıf dı sonıd a waqfat da qalilotho hiye tlıble zuze mani laşan i şıltonutho.  Bi sbuthathe u qoyumo du cameydan bu parlemento du athro Tuma Çelik nqile rmoyto dkımşayıl lu wazire dkıtyo da waqfat u du turizm.

Ba yawmotho dı şaficiwena u rişqutno d’Turkiya mabdele kampanya du teltimo da zuze mu camo laşan dobe lani dıhzelın husrono mu kewo di Corona.

Bu zabnano da athrawotho dıkfayti me casqutho  belhude u athro dı Turkiya ktolıb zuze mu camo, elo a athrawotho hrene kdırşi mışkıl kibin howın mcawnone la yaqrotho u la more da şuğlone dhawilin husrone.

Me gabo hreno Turkiya mşadarla egartho la waqfat u baynothaye a waqfat da qalilotho u ktılbi mane dhowın sanode bi kampanya dı mabdele u rişqutno Erdoğan.

İ sbuthathe u qoyumo du cameydan bu Parlemento du tahro d’Turkiya Tuma Çelik bi rmoyto dıkthule lu waziro du turizm nqilole lu parlemento du athro.

Bi rmoytathe u qoyumo kımşayıl i kampanyathe macburiyeyyo, u be bzabno bu şedoro di egartho kito xıd amro, u mede dıkmidici i awyutho mede dkuthyo mu leboyo u latyo bu tlobo da egrotho.

Xdu mathlo dkomır b’Turkiya kulmede kowe mıhlıf i şıltonutho dsındo u camo ktılbo mene dımcawın i şıltonutho.