Lemond kıthula cali sbutho di eqartho du kohno d’Ramzi Diril

İ sferyawmo Franşoyto d’Lemond, mawdacla du babo wi yemo du kohno di cito Kaldoyto d’Stanbul, htifi m’grube mzayne mu baytaththe dkıtyo bi fnitho d’Hakkari bu tayman madınho dı Turkiya. Bu tebo dıfrısla Lemond, mawdacla da haylawotho Turkoye di mşaynutho lıssımlın i wolitho dıknıflo aclaye, bu qefoyo da tıre farsufe htife di iqartho dı Diril.

İ sferyawmo Franşoyto mşamahto d’Lemond, frısla tebo rwiho calu htofo d’Hırmız u Şmuni Diril bu slogan “gunho bişo dhawi cala tre abohe du kohno di cito Kaldoyto d’Stanbul”.

İ sferyawmo kmawdıco di teşcitho mşarela bi qritho Mşihoyto d’Mehre dkıtyo bi fnitho d’Şırnaq d’Hakkari, dıkcayşowa eba i iqartho Kaldoyto dıkmişaklo m’Şmuni 65 ışne wu barzawgayda Hırmız 70 ışne cama 11 nacimaththe dıkmaşıfciwo u zabnaththe bi zaricutho ubaynıd da qatce da hyewın.

Lemond mawdacla datre abohe di iqartho dı Diril htifiwo 11 bu yarho d’Konun u Haroyo mu baytaththe mhın grube mzayne, ubu siqumo d’20 bu yarho dşaficina anabne kımqafın i şlado di yemaththe Şmuni b’duktho dıkrıhqo balhude 10 qatinotho halxo mu bayto di iqartho, elo i ctidutho du babaththe hul ucdo latyo idıcto. Lemond kımşaylo: qay htifi a’tre zawgani?, manyo dkobıc dsoyım zarar l’tre farsufe sobe?, u şuwole hrene dkito bhawnıd da nabne di iqartho, bu zabno dlısımlın ahaylawotho Turkoye di mşaynutho i wolithaththe bi sbuthathe.

Be bzabno, Lemond mawdacla di şultonutho dı Turkiya labico dımbahso mede cali sbuthathe, uftıhla buqore ğnize, ululaste fsoso l’noşo dobo mawdconutho cala buqore, elo anabne di iqartho di Diril kımakdi di şultonutho dı Turkiya lımahwela ulo şıkıl d’yasifutho lu mede dhawi cama tıre abohothaththe.

Qaşişo Remzi Diril bi maqırhonutho dhule li sferyawmo d’Lemond bu menyonayda dşafıc mırle “mi celtho du muzoğo dlatwe towo, lısim kroxo u buqoro xdu mede dıklozım. Ubalhude tayısto dlo pilot mafrowa tarte naqlat lalcıl di qritho. Hanowe kul mede”.

Camgabıdathe, ha manahunone du kohno Remzi bi maqırhonutho dhule mırle “kul naqla ktılbinawo mcadronutho mi şultonutho, elo noşo lıkmahıtwo bolo la talabaydan, ulımsanatlın la qroytotho dsımlan”.

Ha ma şbobe di iqartho dı Diril, b’zuctho mahkele li sferyawmo d’Lomond, u makadle dıhzewole farsufe mzayne dıhtıfwolın u babo di iqartho Hırmız, elo cal di bethzawgayde mazcaqwola u rfıdwola dmaydile l’ruhe, a’gabre mzayne htıfwolın atre camıhdode.