Falqo d’athar catiqo mu zabno di mamlaxtho dan Othuroye dkıtyo 3 alfo eşne, gıdmıfrıs cal qariwo bi bethcatiqotho Athronoyto du Swed

STOCKHOLM – İ bethcatiqotho Athronoyto du Swed dkıtyo b’Stockholm frısla u falqo di luho catıqto u makthabzabnoyo dıkducro l’meqım 3 alfo eşne umu zabno di mamlaxtho dan Othuroye. U atharano, hawiwole eşne yarixe bu cambar di bethcatiqotho cal dkıtwo zuctho dhoze husrono bu gloho.

Elo bıthır fsıqwola i bethcatiqotho dfırso u atharano bi bethcatiqotho wu 22 bu yarhano mtayabwo yawmo dilonoyo bi bethcatiqotho. U yawmano mtayıb camu federasyon Othuroyo, leşan dmitahwe u atharano lu camo. Lu yawmano hadırwo ba mowat dıbnaynoşo; beynothaye mu camaydan du Swed. Bi hfituthathe’ste mahwe raqde marduthoye, lbuşe catiqe dan Othuroye u maşmıc musiqi.

U atharano, meqım bu qusro d’Nemrud elo latyo heş idico aydarbo safiwo bu Swed 875–860 f. Kr. İ luhathe hiwo’wa ban 1866 mi malıktho du Swed Josefina li bethcatiqotho. U Cıraq dhawi wahdo da qrobo, sagiyoyutho ma atharayde a makthabzabnoye’ste ya mahrıwi u yaste gniwi u mzabni bu pazar komo.  

Bi sbuthathe’ste u folitiqoro du camaydan mu gabo da Mşihoye Demoqratoye di karxutho d’Botkyrka du Swed Aday Bethkınne grışle u zuhoro cali tatirutho dhuwlın an abohothaydan d’Bethnahrin li mdinoyutho dbritho u aydarbo kımthabti an athrani i ithutho du camaydan u Suryoyo Oromoyo Othuroyo Kaldoyo.