Fateryarxo Mor Yusuf Younan hawile ytawto cam tukoso da zedqe noşoye

BAYRUT — I qadişutho du fatıryarxo Mor İğantiyos Yusıf Tlithoyo Yunan, athmıl mıstaqabele bu qentrunayde u fatıryarxoyo di cito Suryoyto Qatholiqoyto bı Bayrut, u rişono di knuşto emwothoyto da zedqe noşoye hasyo professor Tomas Şirmaxer dkıtwe meqım u notarrozo gawonoyo du şutoso du Huyodo tibeloyo da Evengeloye The “World Evangelical Alliance”. 

Camu hasyo Şirmaxer kıtwo taşdarto mu şutoso d’The One Voice Foundation, u hadirı ste bi ytawtathe i msadronitho athronoyto di tahrazto d’Emwotho Mhaydotho laşan du kyono udi haymonutho professora Lara Wakim. 

Bu şuroyo di ytawtathe, fatıryarxo Yunan mahkele b’şıkıl karyo calu makthabzabno di cito Suryoyto Qatholiqoyto d’Antiyuxiya wu frosayda ba n’athrawotho mşahılfe du madınho udu macırbo dıbritho, u mşalatle ste bahro cali şkihutho Suryoyto b’Lebnon ucalu makthabzabno du kursiyo fatıryarxoyo. 

Mxasra hreto, hasyo Şirmaxer bu mamlo dsımle mqalasle u dawro rişoyo dıkmıştacele fatıryarxo Yunan bi rocyutho di cito uda mhaymne ubu teqwiyo di şkihutho Mşihoyto bu madınho ubu sutoro da zedqe du barnoşo udu neshonayde. Hasyo Şirmaxer dımqadamle karyoyith mawdconutho cala fulhone di knuştayde, mqadamle ste zminutho l’fatıryarxo Yunan laşan dhodır bu “Konferans emwothoyo d’Bayrut dacla gawne mşahılfe, cali haymonutho ucali aminutho” dgıdmitayıb bu yarho dı Tışrın u Qadmoyo dıbqamuthayna.   

Camgabıdathe, fatıryarxo Yunan grışle u zuhoro cali aykanoyutho gawonoyto d’Lebnon udu madınho mescoyo, u makadle ste i ulsoyutho dhowe u Mşihoyo sohudo li haymonuthayde cıl ma şuhlofe u casqıwotho dkowın bıbritho, u dıqle ste cali ulsoyutho du diyalog laşan du şlomo. 

Bu huthomo di ytawtathe, hasyo Şirmaxer mdaşanle li qadişuthayde u şukono d’faroşo du neshono xıd remzo di hubo udu iqoro. Ubebzabno, fatıryarxo Yunan mdaşanle li mcalyuthayde u midali fatıryarxoyo d’Sayıdıt Alnajat xıd hubo u tawdiyotho li socurutho dsımle.