Fatıryarxe tlıblın dmitakle u cnufyo admonoyo bi hiğmonutho d’Sweda

SURIYA — I marcitho d’Busra ud’(H)oran udu Turo d’Alcarab da Rum Malkoye Ortodoksoye bu buyono dıfrısla mawdacla du mede dkowe b’Sweda qrobo barbroyoyo dıkqotıl u nacimo wu rabo, u tlıbla m’Emwotho Mhaydotho umu kenşo emwothoyo dşıfci baroyo li harake. I marcitho maglela ste liholo dkito zıd m’300 alfo yaqrotho b’Sweda dıkcayşi ucdo i casqutho du qtoco du kahrobo wi bsirutho da maye, u muklo wa samone. 

Bebzabno, u mathlono du hasyo da Rum Malkoye b’Sweda ubu Turo d’Alcarab qaşişo Tony Bıtrıs mawdacle du hçomo dsim cal Sweda ganohowe, u mırle “gıdfayşina ido bido cama n’ahunonaydan a’Druz, lıktorinalın. Cayşina acmaye mowat d’ışne u gıdmaythina acmaye. Ahna latna mzayne ulatlan ste bceldbobutho mqabıl d’noşo. Ahna kıqorina lu şlomo”. 

Camgabıdathe, I fatıryarxutho d’Antiyuxiya udkule madınho da Rum Malkoye Ortodoksoye bu buyono dıfrısla, mawdacla du mede dkowe b’Sweda lake bıgwinıd di noşuthoyo. I fatıryarxutho dmawdacla di cito kımcaqbo a’şuşote folhoye b’Sweda, mqalasla ste a’fulhone di mescoyutho dhın athrawotho qlimoye u emwothoye dmaklelın u qtolcamo dıkdoyış a’prensibe di ciyeşe mşawtafto. 

M’gabo hreno, I efetrofutho di marcitho da Latin d’Suriya, bu buyono dıfrısla mawdacla du şroyo da krize qaşye du athro laybe dhowe star bu darbo du diyalog şariro u ftiho bayn di iqartho hdo d’Suriya. I efetrofutho sımla qroyto li şultonutho dmazido a’fulhonayda, bnişo dmınfıq mqabıl da dyoşe di mşaynutho, u tlıbla ste ma gabe u tarafe kulle dşıfci li harake, laşan dmitaqım u ambargo dmahıt cali mditho d’Sweda, udmıftıh koridore noşoye mşayne dkobın aftho la mdinoye dqathlın samone, tedawi, maye u muklo.