Fatıryarxo Al Raci yatuw camu Rişqutno Mişel Caun

İ qadişutho du fatıryarxo di cito Suryoyto Marunoyto Mor Bşara Bıtrıs Alraci, meqım mi socuruthayde lu Vatikan, yatuw camu rişqutno d’Lebnon Mişel Caun.

 Alraci bıthır mi ytawtathe bu knuşyo dsımle lu tboco froso, naqla hreto sımle sturyo arişone folitiqoye cal dlımhalıq hul ucdo u lo dawse lafu şekolo di şultonutho d’Lebnon.

 U rişqutno d’Lebnon Mişel Caun athmıl mıstaqbele bu qusro dı Bcabda bı Bayrut, i qadişutho du fatıryarxo di cito Suryoyto Marunoyto Mor Bşara Bıtrıs Alraci meqım mi socurutho dıkmıntır dsamla lu Vatikan, bnişo dmıştawtıf lu zawho di masırhonutho da kardinale hathe, u dloqe i qadişutho du papa Mor Fransis Qadmoyo.

Alraci bıthır mi ytawtayde cam Caun, sımle knuşyo la gelyunore, u mawdıclelın dkula naqla meqım mıdhozıq lu Vatikan kloqe u rişqutno d’Lebnon, bnişo dnoqıl mawdconutho rwihto cali aykanoyutho du athro ducdo li qadişutho du papa dıkmahwe aminoyith yasifutho l’Lebnon.

Calu şuwolo dımşayıl mene bi sbutho da buqore dcalu furqoco du lmino d’Beyrut, fatıryarxo Alraci mırle; İ sagiyutho da comure di fnitho dıhzela u husrono Mşihoyene. U ahna lırğışlan hul ucdo dsim mede la comurani dıkmahwe dkıtna ha camo u masrena kulayna camıhdode. Kıbacno marke dımqadamno tahanyotho la clayme, la zawce ula tukose dmawlıdi baroyo bıthır mu furqoco, laşan dımcadri abnaynoşo. Ahna u medano kfaytinale, cal dıklozım kula naqla dımmina d’Lebnon hıdo iqarthoyo, wa gawne mşahılfe tawdithoye u marduthoye dkıtle kımathli u asas di demoqratoyuthayde u di methfathonuthayde lıbritho, cal dkıtyo athro dıkforış i tawditho mi şultonutho, u ahna lıkıbcina dımvaycina i şroluthathe.

Bebzabno, u fatıryarxo da Suryoye Marunoye makadle du qrobo mqabıl du fasad klozım dlıhodın ba şutose d’Lebnon, ba bankat uba wazirwothayde kulle, u klozımste du bethdino dımdawım dsoyım i wolitho dıknıflo acle bi sbuthathe.

Camgabıdathe, Mor Bşara Alraci tlıble dmişakıl şultonutho şnizto dluyo masırto cam gabe folitiqoye, bnişo dqıdro dmaqimo Lebnon mu mawto, u ba melani mdawamle;Lebnon lıfayış ktocın dşofıc yarho dlımihalıq ebe u lo dawse bi sbuthathe. Manyo dkıtle u zedqo dqotıl u athro bu şıklano?.