Fatıryarxo Alraci sımle sturyo a folitiqore Iraqoye

İ qadişutho du fatıryarxo di cito Suryoyto Marunoyto Mor Bşara Bıtrıs Alraci, sımle sturyo qaşyo arişone folitiqoye d’Lebnon, cal dlımakşarlın hul ucdo d’şorın u kriz momunoyo qaşyo du athro.

 Mor Bşara Alraci bi maqırhonutho dhule lu tboco froso, mzaharle mu qedomo da rişone folitiqoye dkowın tırpılto qum di mcadronutho emwothoyto l’Lebnon.

 İ qadişutho du fatıryarxo di cito Suryoyto Marunoyto Mor Bşara Bıtrıs Alraci, bi maqırhonutho dhule li sferyawmo Lebnonoyto d’Almarsad, sımle hjomo qaşyo cala rişone folitiqoye d’Lebnon cal dlımakşarlın bu şroyo du kriz momunoyo dıtrele u camo dcoyış b’fıqriye.

Bi maqırhonuthayde Mor Bşara Alraci thımle arişone folitiqoye d’Lebnon dbelhude bu yuthronathe u farsufoyo kmıftakri, u tlıble mu rişqutno rabhaylawotho Mişel Caun dşofıc li harake.

Fatıryarxo Alraci mırle “a’folitiqoyani kıbci dıtolın i mşalutho dkıtlın calu texliyo di xazina du athro, udlısaymi ulo şuhlofo msimono dıkmanfıc Lebnon. Amşale folitiqoye bayn duktho dkıtne, latlın i caşinutho wi hirutho gawoyto dloqın hdode udımqafın a’darbone du nfoqo mi casquthaydan i folitiqoyto”.

Bu huthomo di maqırhonuthayde, u fatıryarxo di cito Suryoyto Marunoyto mzaharle mu qedomo da rişone folitiqoye d’Lebnon, cal dıkmonıc an’athrawotho nuxroye d’obın i mcadronutho dkıtyo Lebnon sniqoyo ela.

Mi celtho du fasad dımbarbız ba şutose ruşmoye d’Lebnon kulle, u camo du athro kımdawım ba tagılyothayde mqabıl da rişone folitiqoye. Wucdo ste Amerika wu kenşo emwothoyo mawdacle dkıtyo hadiro dsonıd udımcadır Lebnon, ida dımhalqo i şultonutho dawsat dkımakdi dlatyo yasirto da fusqone dkımbayanlın u gabo d’Hizballa.