Fatıryarxo Mor Bşara Bıtrıs Alraci mawdacle d’Hizballa klozım dıdco du gayso Lebnonoyo balhude u garanti wu msatrono da Lebnonoye kulle yo

BETH KERKE (BKERKI) — Bu zabno dıknıtri a’Lebnonoye dımşaryo i şultonuthaththe dgurşo u zayno lo ruşmoyo mi milişya d’Hizballa uma grube Fleştoye mzayne, i qadişutho du fatıryarxo di cito Suryoyto Morunoyto Mor Bşara Bıtrıs Alraci makadle da Lebnonoye kulle b’awyutho mkanaştone dfoyıt u fusqonano la haye, udhowe u zayno balhude masro cami şultonutho du athro. 

Fatıryarxo Alraci rfıdle ste u zuhoro d’Hizballa dhowe qrobo gawoyo hatho b’Lebnon, ubi maqıblonutho dsımle acme u froshezwo d’Alcarabiya mırle “ulo noşo kobıc u qrobo, a’Lebnonoye sawici ma qrobe, u hatta an’abne da Şica Maşılmone d’Lebnon kıbci dcayşi b’şlomo. Ktılbina mu gabo d’Hizballa dkole qum d’nafşe u qum di mothonoyuthayde, udımhalıx bu darbo di dawle, uklozım dodıc du gayso Lebnonoyo balhude u garanti wu msatrono da Lebnonoye kulle yo”. 

M’gabo hreno, u waziro di baroyutho d’Lebnon Yusıf Rajji makadle dlıffayış kito dcoro mu fusqono du tesiro du zayno cami şultonutho d’Lebnon, ubebzabno mqalasle u fusqono dmıdla i şultonutho bi sbutho du teslimo du zayno d’Hizballa u mırle acle fusqono makthabzabnoyoyo. Rajji bi maqıblonutho dsımle acme u froshezwo d’Alcarabiya mırle ste “Lebnon hani ba casrowat d’ışne kşofıc b’kboşe u şalitwotho d’hın gabe dlatlın esore acme. U gabo d’Hizballa ksoyım tagorutho ba Şica d’Lebnon, ukıkobış u fusqonaththe”. 

Camgabıdathe, u froshezwo d’Alcarabiya mawdacle du rişono du parlamento d’Lebnon Nabih Bırri dkıtyo bebzabno u rişono du zawco d’Amal wu noqufo du gabo d’Hizballa, sımle qroyto lu gabo dhowele methcadronutho camu gayso d’Lebnon bi sbutho du teslimo du zaynayde. Bırri makadle ste dlıffayışle Hizballa manface dothe dmıstacmıl a’zabuqone d’Lebnon laşan dnofıq mqabıl du fusqono du teslimo du zaynayde udmadrele. Bırri sımle ste qroyto l’Hizballa dsonıd i şultonutho laşan dmişawhıro i şkihutho da haylawotho d’Emwotho Mhaydotho d’Unifel bu taymno d’Lebnon.