Fatıryarxo Mor Yusıf Yunan bi lqoyto dcamu papa du Vatikan makadle i ulsoyutho du snodo di şkihutho Mşihoyto bu cafro da n’abohotho

VATIKAN – İ qadişutho du papa Mor Liyon da na’14 mıstaqbele athmıl bu qusro şlihoyo bu Vatikan, i qadişutho du fatıryarxo di cito Suryoyto Qatholiqoyto Mor İğnatiyos Yusıf Tlithoyo Yunan dkıtyo i lqoyto qamoyto dıkmisomo baynothaye mu zabno dımnaqe Liyon da na’14 papa hatho lu Vatikan.

Bi ytawtathe, fatıryarxo Yunan mqadamle tawdiyotho lu papa cali awyutho dıkmahwela lafa Mşihoye du madınho, ucali hzayto dkıtle cala krize u casqıwotho dkımdawmi ba n’athrawotho du madınho. Fatıryarxo Yunan mahwele ste i zuctho dkıtle mi golutho da Mşihoye dilonoyith i claymutho wu tathirayda calu dactid da Mşihoye du madınho. Bebzabno, fatıryarxo Yunan makadle i ulsoyutho du snodo di şkihutho Mşihoyto bu cafro da n’abohotho.

Camgabıdathe, u fatıryarxo di cito Suryoyto Qatholiqoyto mahkele cali aykanoyutho di citayde, dkımnasyo dnıfoq mqabıl da krize momunoye uda casqıwotho dkito bu haqlo di mşablonutho da marciyotho, u grışle ste u zuhoro cala socurwotho dsımle i qadişuthayde la marciyothayde bu athro ubi golutho, u mawdacle da mhaymne dkıtne bi golutho sniqoye l’yasifutho zıd cal du menyonaththe kul dkothe kzoyıd.

Mxasra hreto, u buyono fatıryarxoyo mathkarle du papa Liyon kımtahqıb i aykanoyutho mahişonitho bu madınho mescoyo, dilonoyith b’Lebnon, b’Suriya ubu Ciraq. U mawdacle ste dkıtyo ruhonoyith qariwo ma n’athrawothani, ukımnase dıtolıb mıbritho dsındilın laşan dmişarır ebaye u şlomo udhowe awyutho bayn da camaththe.

Bu huthomo di ytawtathe, fatıryarxo Yunan mqadamle lu papa u şukono d’Sayıdıt Alnajat xıd hubo u iqoro li qadişuthayde.