08/08/2025

 Folitiqoro Aday Beth Kinne: u gabo da KristDemokraterna rahıq ma timoyotho tawdithoye

U folitiqoro du camaydan Aday Bethkınne dmawdacwole dnafıq mu gabo da Mşihoye Demoqratoye di karxutho d’Botkyrka du Swed, huwle ucdo maqırhonutho hathto lu tbocofroso. Bi dafayde du nawlo, Bethkınne mfanele a kthawyotho dfrisi bhaq dide u maqrahle  a celotho dtrele mu gabayde da Mşihoye Demoqratoye.

BOTKYRKA, Swed — Athmıl bu tebo dfrıswolan mi maqırhonutho dkthuwole u folitiqoro du camaydan Aday Bethkınne calu fusqono dmıdle, dtore mu gabayde da Mşihoye Demoqratoye di karxutho d’Botşyrka du Swed, mawdacwole i klayto wi hzayto dkıtwole calu gabayde drahıq ma timoyotho d’Mşihoyutho. İ klaytathe du Aday, xlıqla zmomo rabo bu tbocofroso du Swed, u mnase dmihaqır u dmitancım u folitiqoro du camaydan. Calathe Bethkınne frısle ucdo maqırhonutho hreto bi dafayde d’X leşan dobe funoyo lani dımşahlaflın u mamlayde-lfuth u renyathe.

Calathe Bethkınne mırle; A yawme haroyani şafici b’reğşe frişe u hboso hem cali media u hemste nafşoyo. Elo camathe’ste nafiqo i şrorutho li holo manne a sanode u manne dkıtne mqabıl.Bethkınne mahkele cala celotho dtrele mu gabo, elo i media mnaqela dlo mbhaso aclaye ucali şrorutho. Lfuth Bethkınne a celotho dmahwele cali isticfayde, du gabo rahıq ma timoyotho tawdithoye, hariwo i siyasayde dcali iqartho, lo kmiqadım snodo u yasifutho la Mşihoye dkıtne sniqoye, lo mawde bu Sayfo dan 1915 uğer.

Bethkınne kımawdıc’ste, du tbocofroso mfaşaqle fawdo u sturyo dımqadamle bi sbutho da zedqe noşoye u m’akadle, dhuwe kull naqla mhafadle a timoyotho noşoye. B’kenşo demoqratoyo, klozım ha dqodır dımqadım sturyayde dlo teçmido, kull noşo kıtle zedqo lu renyo hiro ulu maftahfemo. U şıkıl du hçomo folitiqoyo dsim cal Bethkınne, i celtho dhuwle u folitiqoro du camaydan u renyayde calu Pride parad dsımlın a bnaynoşo dıkruhmi farsufe me cayni ğenso-awkith a gay.

Lfuth Bethkınne, u paradano latle asirutho b’moral, kibe zalto wa tukose kımawdıci a tahrazyothathe du ideoloji l’nacime dkibın dmi’athri menaye. U Aday komır; Klozım torina da nacime dcayşi i nucmuthathe-dlo tathire folitiqoye. Kodacno dkito ğalabe folitiqore dıksundi u renyaydi bu Mawtbo di karxutho, elo kıfayşi yatiwe u lıkmıjğoli. Ono mawdacli u renyo wi hzaytaydi u fawdo’yo d’noşo dımşahlıf u mamlaydi lgoran dıthe.