Fris tarte egrotho d’tawdiyotho li iqartho dbe Haffo mu Slibo Suryoyo u mu gabo du Huyodo Suryoyo Tibeloyo

U Slibo Suryoyo wu gabo du Huyodo Suryoyo Tibeloyo frıslın tarte egrotho d’tawdiyotho li iqartho dbe Haffo, cal mcadronutho zuzonoyto dımqadmo lu cameydan d’Suriya u d’Lebnon cali ruho du mnohnafşo Ninos Aşuri Minasson.

Ba egrothani kmiqadım tawdiyotho li iqartho be Haffo, dkuwyo mcadronitho lu cameydan du athro dıkfoyıt me casqutho rabtho.

Ba tarte egrotho dımşadri mu Huyodo Suryoyo Tibeloyo mu fercayde di mcadronutho umu Şutoso du Slibo Suryoyo, kmawdci da 17 alfo krone dımqadmila i iqartho dbe Haffo matın, u hawlın yuthrono rabo lu cameydan d’Lebnon u d’Suriya.

A egrotho camgabe dıkmqadmi tawdiyotho li iqartho dbe Haffo dhulın i mcadronuthathe lu cameydan cali ruho d’Ninos Aşuri Minasson dkıtyo u xarız be Haffo, kıtulbi rişo basimo li iqartho be Minasson calu husoyo du abrathe u Aşuri.

İ iqartho be Haffo, meqım’ste mqadamwola 37 alfo krone mcadronutho lu cameydan d’Suriya, Turabdin, Lebnon uli daşdo d’Ninwe cali ruho di maqdışoyto Macida dkıtwa i barthzawgo du maqıdşoyo Gawriye Haffo, d’nqilowa ma hayani meqım zabno.

 Ba egrothani dımşadri, kmitahkır’ste da mcadronwothani ulsoye lu cameydan bu zabnano, dıkfoyıt me maşıqle u casqutho bu athrayde da abohotho.