Gabe frişe du camaydan sımlın u duxrono d’Simele

BETHNAHRIN — I fatıryarxutho di cito d’Madınho d’Othuroye dkıtyo u qentrunayda bu Ciraq, bu buyono dıfrısla madhkarla u yawmo du sohdo Othuroyo dkıtyo u duxrono da 92 ışne du qtolcamo dhawiwo calu camaydan bi qritho d’Simele cal idothıd da haylawotho di malkutho du Ciraq bi şato da na’1933 mi celtho di hiyoyuthaththe i umthoyto. I fatıryarxutho bu buyonayda mawdacla ste dkımsalyo laşan du husoyo di ruho da sohde du camaydan dkıtne dlo htitho, ulaşan du husoyo da sohde da Mşihoye kulle dnafili sohde calu madhıbho di haymonuthaththe uda prensibaththe. 

Camgabıdathe, u Mawtbo Camoyo Kaldoyo Suryoyo Othuroyo du Ciraq madhkarle u yawmo du sohdo dkıtyo u qtolcamo d’Simele. U Mawtbo Camoyo bu buyono dıfrısle tlıble dmişarrıro i kinutho la debhe udmıkrohi a’qatole, udmitadcır u zedqo la nubğre da sohde da qtolcame du Sayfo, d’Simele, d’Soriya, d’Al Alnfal udi cito d’Sayıdıt Alnajat hul qtolcamo dsımle Dacış cali daşto d’Ninwe wu furqoco haroyo di cito d’Mor Alyas b’Suriya. Bebzabno, u Mawtbo Camoyo tlıble mi şultonutho du Ciraq dmafito la haye u fusqono dmişatıs hiğmonutho bi daşto d’Ninwe calu asas di çuğrafia udi mdabronutho, bnişo dmıkle mqabıl da siyasat udi aginda du şuhlofo demoğrafoyo. 

Mxasra hreto, u rişono du qlimo d’Kurdistan du Ciraq Neçirvan Barzani bu buyono dıfrısle mırle “adyawma bu duxrono dşafıc 92 ışne calu yawmo du sohdo Othuroyo, kmadhkırina a’debhe du qtolcamo d’Simele dnafili sohde bi şato da na’1933 cama comure d’zıd m’60 qıryawotho bi hiğmonutho d’Ninwe ud’Nuhadra. Debhe dnafliwo cal idothıd di şultonutho di malkutho du Ciraq bu zabnawo”. Barzani bu buyonayde makadle ste cali sbutho du sutoro udu teqwiyo di mardutho mgawanto udi ciyeşe mşawtafto bayn da came mşahılfe du qlimo. 

M’gabo hreno, i şultonutho gawoyto di hiğmonutho d’Kerxıslox du Ciraq madhkarla u qtolcamo d’Simele dıdbih ebe ba n’alfowat mu camaydan. I mdabronutho d’Kerxıslox mtayabla athmıl taklitho qum du benyono di hiğmonutho, u mşarela b’qatinto d’şetqo cali ruho da sohde d’Simele. Li taklithathe mıştawtafle menyono d’mşale gawoye, hfite, mathlone da qalilwotho umthoye u tawdithoye cam rişone tawdithoye u mşale d’şutose marduthoye.