Garo Paylan mqadamle rmoyto bıhaq da haqarat u rdufye dhawın cala tawdiyotho dılatne maşılmone

U qoyumo du gabo demoqratoyo da came Garo Paylan mqadamle rmoyto lu tahlufo du rişqutno Fuat Oktay bıhaq da haqarat u rdufye dhawın cala tawdiyotho dılatne maşılmone.

Paylan kımşayele lu tahlufo cala mamle u kıthawyotho wu hjomo dhawi cali cito d’Armınoye, cal rişono di tawditho yudayto u Bartelamaos u ğer hjome.

Bıthır mu qoyumo du cameydan Tuma Çelik dımşadarwole egrotho la rişone tawdiyotho dsim hjome u haqarat aclaye ucdo u qoyumo Garo Paylan mqadamle rmoyto lu tahlufo du rişqutno dıktolıb mene funoyo bıktahwto mın sımle u gıdsoyım mqabıl da hjomani.

U qoyumo du gbao di HDP dıkmahke cala hjome wa haqarat dıksaymi hın farsufe u dilonoyith u tboco froso dkıtyo qariwo lu rişqutno Erdoğan.

Xıd mathlo kobe bıhdo mğaltho kmahkiyo d’Fethullah Gulen d’Erdoğan omarwole myaqro malfono Gulen Armınoyoyo wi emo yudaytoyo, hathe haqara rabthoyo u maqharla a camani u ktocni ğamo ramhıl mın gıdhowe bıthır ma hjomani.

Garo Paylan kroyız a şuwole dıktolıb funoyo aclaye.

U şuwolo qamoyo komır en u tahlufo du rişqutno kıtle idactho cala haqarat dıfrisi bi mğaltho d’Qusro d’Erdoğan dıkmıhjım cala Armınoye wa tawdiyotho hrene.

Kmahwe knıtrutu d’naqqa hreto dmisım hawbe xıd hawiwo mqabıl d’Hrant Dink u dayroyo Santoro dı qtiliwo bıthır mıd rmızwo aclaye bu tboco froso dkıtwe qariwo lu qusro d’Erdoğan.

Bi mşaluthathe kmitawmır dhın mamthalone da tawdiyotho laqın l’Fethullah Gulen kımşayalno lmo a hadome du gabo di AKP u di şıltonutho kule lı  mıştawtaflın acme.

Bu zabno di şıltonuthathxu lozamwola Gulen Erdoğan omarwole malfono myaqro, u ucdo dıkmitawmarle Armınoyo hal latyo axlaksıziye u bcelıdboboyutho?