Geir Pedersen mzaharle ma mharbone nuxroye dkımmathli qento rabo dkımhadıd u maşıqlo folitiqoyo hatho d’Suriya

NEW YORK — Athmıl u Mawtbo di Mşaynutho d’Emwotho Mhaydotho qtırle ytawto dıdrışle eba a’şuşote du kriz folitiqoyo d’Suriya. U mathlono dilonoyo d’Emwotho Mhaydotho b’Suriya Ger Pedersen bu mamlo dsımle bi ytawtathe, mawdacle di şalyutho dkito ucdo hul darğo bua thro d’Suriya latyo i mıcnayda şalyutho aminoyto, u mathkarleste du qento dhowe cnufyo b’gawıd du athro heş şkihoyo, bu zabno dlayto tedbire şarire du bnoyo du tuxlono bayn da came u madhhabe mşahılfe d’Suriya. 

Pedersen bu mamlayde grışle ste u zuhoro cali şafyutho dkıtyo u asas du kuşoro du maşıqlo folitiqoyo hatho d’Suriya, u sımle qroyto dmibayın tahrazto rwihto laşan du groşo du zayno udu turoso du haqlo di mşaynutho, ubebzabno mzaharle mu qento rabo dkımşaklile a’mharbone nuxroye dkıtne hadome bu gayso d’Suriya. 

Camgabıdathe, u mathlono emwothoyo m’ayadle a’fulhone mşawtfe d’Amerika, d’Yurdnon ud’Suriya dmişakıl grub d’fulhono bnişo dmısnıd u tekliyo da taxtuşe, ubebzabno mahwele ilothnihutho dkıtle mu hrowo du muzoğo folitiqoyo d’Suriya. 

Cali sbutho di hiğmonutho d’Sweda, Pedersen mahwele dkıtle sabro dmimıd hşowo ma mşale dcala gedşe hroye dhawın, u sımle ste qroyto dmıfroso i netiçe da buqore lu ray gawonoyo dıbritho. 

Bu mamlayde, Pedersen mayadle ste an’esore dkito bayn da mathlone du garbiyo udu madınho d’Suriya wa mathlone di şultonutho dı Darımsuq. 

M’gabo hreno, u tahlufo du notarrozo gawonoyo di daira d’Emwotho Mhaydotho dcala sebwotho noşoye-Martin Griffits grışle u zuhoro calu kriz noşoyo dheş dıkmdawım dqoşe b’Suriya u dilonoyith b’Sweda. U mamlano d’Griffits dsim bu zabno du droşo dhawi athmıl cal Suriya bu Mawtbo di Mşaynutho d’Emwotho Mhaydotho, kali’ste cali sniqutho dkito li mşaynutho da fulhone noşoye dıkmisomi bu athro.