18/02/2021

GHS mahwele u haşeyde mqabıl du buyono da athrawotho d’Astana

U gabo du Huyodo Suryoyo d’Suriya, mahwele u haşayde mu buyono dan athrawotho d’Astana, dıthımle i Mdabronutho yothoyto dkıtyo tarmitho dıkfulğo anarcotho d’Suriya.

 GHS bi maqırhonutho dhule, sımle qroyto l’Rusya, Turkiya wu İran dımqafın şroyo folitiqoyo dıkmakle i casqutho du camo d’Suriya, mdarbıd dımhalqi thome li mdabronutho yothoyto dkıtyo i tarmitho demoqratoyto qamoyto bu madınho mescoyo.

 Rusya, Turkiya wu İran dıksaymi u garanti du qyomo d’Astana, frıslın buyono bu huthomo du knuşyaththe bi mditho d’Soçi bi mıştawtfonutho d’mathlone mi şultonutho d’Rusya, du İran, dı Turkiya, dı Darımsuq wa çatawiye dı Turkiya. Bu buyono dıqre mu mathlono dilonoyo du rişqutno d’Rusya bu athro d’Suriya Alexander Lavrantiyev, naqla hreto a’tlotho athrawotho du garanti mahwelın i bceldboboyuthaththe la came du garbiyo udu madınho d’Suriya, u mırlın “ahna b’fusqono kamilona dnıfqina mqabıl da tahrazyotho faloğe dkıtne bıthır du nahro dı Froth awkith di mdabronutho yothoyto dıkmaciqi i hdoyutho da n’arcotho d’Suriya”.

Cala thomani, u gabo du huyodo Suryoyo d’Suriya d’GHS bu hfuxyo dmahwele naqla hreto makadle di mdabronutho yothoyto tarmitho dıknıfqo moro li hdoyutho dan arcotho d’Suriya yo. U malolo du gabo Robel Bahho bi maqırhonutho dhule l’Suroyo TV, mahwele u haşo rabo dkıtle mu buyono haroyo d’Astana dkımhalıq thome barile dlatne şarire, u mırle “kıtwolan sabro da tlotho athrawotho Rusya, Turkiya wu İran dnıfqiwo bu buyono dıkmahıt ide calu jurho d’Suriya dıkxoyır, udıtfkiwo u athro lafu şlomo uli mşaynutho, ulo dımhalqi thome, dmarwıhi i fliğutho bayn da Suriye udıtorın u kriz dımdawım cali rağlo”.

Camgabıdathe, u malolo d’GHS mamtele lu bolo aydarbo u gayso kaboşo dı Turkiya kımacıq i hdoyutho d’Suriya bu kboşayde d’zıd me 10% man arcothayda, uba melani mdawamle “i hdoyutho, i mşaynutho wi morutho da n’arcotho d’Suriya kımmathli nişo stratijikoyo di mdabronutho yothoyto, wu qyomo kenşoyo di mdabronutho kımakıd u medano”.

Bu huthomo di maqırhonuthayde, u malolo d’GHS Robel Bahho mawdacle d’Rusya, Turkiya wu İran laşan dımharbi i mdabronutho yothoyto kul naqla ktıhmila dkıtyo tarmitho falığto d’Suriya, bu zabno dkımdawmo Turkiya bu kboşo d’fenyotho rabe bu garbiyo, bu madınho ubu garbay macırbo d’Suriya, uba fenyothani kmitaqre u leşono Turkoyo, kmitahto i otho dı Turkiya, kmıftıh botaysawbo Turkoye ukmitıstacımlo i lira Turkoyto bu mahwo şqolo da comure di duktho.

Check Also

U parlamento d’Australia tlıble mi şultonutho du Iraq dımşatso şultono yothoyo lu camaydan dıkhoye bi daşto d’Ninwe

U parlamento federaloyo d’Australia, bıha femo tlıble mi şultonutho du Iraq dımşatso şulto…