Griş u zuhoro cali sbutho da gurube caşıryotho dhawi bu athro du Sved

Bi sbutho da droşe dkowın cali maqırhonutho dsımwole u rişono d’Pwelıs du Sved dmırwole kito gurube bu Swed dkıtne mşatse cali şetısto da caşıryotho da yaqrotho kımdawmo u ba droşani kmıgrış u zuhoro cala gurubane dkıtne nuxroye.

Me gabo hreno bi sbutho da şğuşye dhawın calu tewqido du Kurcan b’Rosnegurd d’Malmö kmitawmır da farsufe dsımlın aşğuşye latweyne belhude me Rosengurde elo athınwo me dukotho mşahılfe.

Bıthır mıd amşale du athro du Swed maglelın dkito gurube dıksaymi hawbe dkıtne mşatse cal mafhum da caşıryotho u dıkmote u mınyonathe l’zıttır me 40 gurube, adroşe mşarelın a gurubani mayko athın awste bu Sved mşataslın ruhaye, lfuth a yaducthone dilonoyo bi sbuthathe da caşıryotho kımmi hın ma gurubani bu athro du Swed mşataslın ruhaye u lo me larwal athın.

A duroşe dkowın bu tboco froso kıgurşi u zuhoro da gurubani mıqa hulın husrono lu kenşo swedoyo u bebzabno bi xasra siyasi mıqa mtakaslın ruhaye u mıqa kıtlın tathir cala fusqone dıkmimodi ba mawtbe du athro.

Megabo hreno a gabe du athro du Swed kmahwın qariwe lıhdode ba rınye dmimıd tadbire qaşye u fusqone casye u bebzabno dmitazidi a ışne du hbuşyo lani dkıtne masre ba gurubani u dıksaymi hawbe mqabıl di noşutho.

Megabo hreno bi sbutho da tebe dıfırisiwo cal şğuşye dsımwolın a farsufe dı nafiqiwo mqabıl du tewqido du Kurcan b’Malmö magle da farsufani latweyne mi şawtho d’Rusengurd dhawiwo a şğuşye ebe elo mşadrewın me dukotho mşahılfe du Swed.

Lfuth u tboco froso du Swed baynothaye Aftonbladet kmahwın da farsufe dsımlın aşğuşyani dkıtweyne maşılmone mtakseweyne bi sbuthathe u lo hawyo sbutho meqım ruha.

Kmahwe adroşe da sıbwothani u da qatle u tenhibo u hboso dcala bnaynoşo gımdawım dmıdrış bu Swed, metul bu zabno haroyo layt yawmo ha dlıg qore dkowe sıbwotho bişe bu Swed.