Grub ma mharbone di PKK maslamlın adyawma u mawqadlın u zaynaththe

BETH NAHRIN — Xıd funoyo li qroyto dsımwole u rişono du gabo di PKK Cabdalla Öçalan, u grub du şlomo udu kenşo demoqratoyo dkıtyo u grub qamoyo di PKK maslamle adyawma u mawqadle u zaynayde bu sebyonayde u hiro, b’zawho dsim bi mcartho d’Jasne bi hiğmonutho di Slemaniye bu garbiyo du Ciraq. 

Lu zawhano mıştawtafle u rişono du federasyon da hudre Suryoye dı Turkiya Awgil Turker lfuth i zminutho dqayıthleyo mu gabo dı DEM parti. 

Lfuth a’vidyowiye dıfrisi adyawma bu tboco froso, 30 mharbone di PKK maslamlın u zaynaththe u mawqadlın, baynothaye Kalşinkove, PKC u tfıngat du qannas. 

U grub da mharbonani dmawqadlın u zaynaththe bu buyono dıfrıslın mırlın “lfuth u mabco towo dkıtlan, ucal dkıtna b’fusqono kamilo d’obina mucdo wazolo ağuno di hirutho, di demoqratoyutho udi sosyalizım bu darbo di siyase demoqratoyto uda qonune, adyawma bu sebyonaydan u hiro, ubi hıdriye dkulayxu kmahırwina u zaynaydan”. 

Bebzabno, u grub di PKK dmaslamle u zaynayde bu buyonayde makadle dıksonıd b’şıkıl kulonoyo i egartho dıfrısole u rişonaththe Cabdalla Öaçlan bu vidio udmırle eba “kmawdeno bu haylo di siyase udu şlomo kenşoyo lo bu haylo du zayno, uksamnolxu qroyto dmahıtitu u prensibano la haye”. 

U grub da mharbone di PKK bu buyonaththe mawdaclın ste du mede dımşarır adyawma latyo fşito, elo athi luhwoyo bıthır mıdbihutho u ağuno rabo, uba melani mdawamlın “mucwo wazole ste u ağuno naqla hreto gıdhowe qaşyo u casqo. Kıdcina i şroruthathe towo. Ukımhaymınina ma cumqe d’lebayna bi falsafe du rişonaydan Caballa Öçalan, ukıtlan tuxlono b’ruhayna, ba hawronaydan du ağuno ubu haylaydan u mkanşo”.