Guteres sımle qreyto dmisım şalyuthzayno bı britho

U notarozo gawonoyo d’Emwotho Mhaydotho Antonio Guterres, sımle qroyto dmisım baroyo şalyuthzayno ban athrawotho kulle dibritho.

 Guterres dmawdacle dibritho klozım dmihaydo mqabıl du virus d’Corona, makadleste di şalyuthzayno gıdimcadro bu sutoro da farsufe dıkloqın qento u husrono rabo mcal fothe du kewo d’Corona.

 Athmıl bu mamlo dsımle Guteres bu qentrun d’Emwotho Mhaydotho bı Newyork mırle; A farsufe mhile, a neşe u nacime, a’mciqe wa galwoye hanine dkobın u timo rabo dkulle da qrobe u taxtuşe dkito bıbritho. Afarsufanine dıkloqın u qento dhowelın u husrono rabo dkulle bi netiçe du kewo du virus d’Corona.

Be bzabno, u notarrozo gawonoyo d’Emwotho Mhaydotho mawdacle ducdo athi u zabno dkolın a’taxtuşe, udmıkle camıhdode mqabıl du qrobo şariro dkito adyawma ba haye di noşutho, u mırle; İ eqartho noşoyto sniqoytoyo adyawma lu medano zıd mkul zabno.

Camgabıdathe, Guteres tlıble dmibayın tire mılyare dolare laşan dmınfıq mqabıl du kewo d’Corona ba fenyotho dıkhoyın ebaye agalwoye, uba melani mdawamle; A galwoye u ğer farsufe dımbarbızi mfothıd da qrobe qaşye kıloqın u qento d’Corona zıd ma farsufe hrene b’tarte naqlat.

Callathe, u notarrozo gawonoyo d’Emwotho Mhaydotho mzaharle mi aykanoyutho dhın athrawotho dıkcayşi i casqutho du qrobo, u mırle; Klozım dlıtocina du sistem awkith i tahrazto du hulmono danathrawotho dkibın qrobo nafilo u shifo. A falohe bu haqlo du hulmono dkıtyo u menyonaththe noquso, b’zabne ğalabe hawın nişo lu hjomo.

U tukoso tibeloyo du hulmono, athmıl mzaharle du virus d’Corona b’surhobo kmıfrıs bı britho. U menyono da farsufe dqayıthlın u kewo d’Corona b’194 athrawotho u qlime şafıc ucdo 377 alfo farsufe, wu menyono da mithe şafıc 16 alfo u 500.