U rişqutno du Ciraq hawile ytawto taşdarto Yezidoye. Komer dıklozım dmitabde bu maşıqlo du bnoyo u hethotho di mditho d’Şigur

BOĞDOD – U rişqutno du Ciraq Cabdıllatif Raşid mıstaqbele athmıl bu qusro d’Boğdod, taşdarto dkımmathlo a’came mşahılfe di mditho d’Şigur du garbiyo du Ciraq. Bu mamlo dsımle Raşid, makadle i ulsoyutho dmitaqwın a’timoyotho di ahonutho udi awyutho bayn da n’abne di mditho, ukali ste cali ulsoyutho dmihaydi a’fulhone athronoye laşan dmitaqwiyo i mşaynutho gawoyto u kenşoyto b’Şigur.

Raşid dımqalasle u dbehnafşo rabo dhula i mditho mqabıl da krulyotho marıhbone dı Dacış, makadle ste dıklozım dmıflıh çıddi, laşan dmişawşıto i aykanoyutho d’Şigur udi ciyeşe da n’abnayda. Bebzabno, u rişqutno du Ciraq grışle u zuhoro cali casqutho dıkloqın a’galwoye d’Şigur, ukali cali ulsoyutho dmisarhıb bu tedciraththe b’neshono la fenyothaththe.

Bu tarano, Raşid makadle dıklozım dmitabde bu maşıqlo du bnoyo u hethotho d’Şigur, dmiqadmi a’mşablınwotho asasi la barmothoye di mditho, udmitahwe tezminat la farsufe dıhzelın husrono.

M’gabo hreno, i taşdarto mahkela cala şartat kenşoye u momunoye dıkcayşilın an’abne d’Şigur dilonoyith bıthır ma gunhe dsımle Dacış, u tlıblın dmitadcıri a’şutose u dayirat ruşmoye lu fulhonaththe b’gawıd di mditho, udmibayın buçça dilonoyto l’Şigur, bnişo dmisarhıb bu tedciro da galwoye la fenyothaththe.

İ ytawtathe athyo luhwoyo bıthır mu fusqono dmıdwola i şultonutho du Ciraq 27 bu yarho d’Konun u Qamoyo dşaficina, dhowın a’Yezidoye ruşmoyith morıd arcotho u mulkone u bote bi fnitho d’Şigur.

Bıthır mıdmitabde bu maşıqlo du bnoyo u hethotho d’Şigur udmiqadım tezminat la comure di fnitho, kmıntır ste dıtofe u fusqonano li daşto d’Ninwe dkıtyo i fnitho makthabzabnoyto du camaydan du Ciraq, dilonoyith du camaydan flğle haşo rabo cama Yezidoye bi netiçe da hçome marıhbone dsımwole Dacış bi şato da 2014, udhawınwo celtho dımgalwın zıd m’120 alfo farsufe mu camaydan l’hiğmınwotho hrene du Ciraq.