Hasyo Nejib Musa mawdacle leybe noşo djobır i noşutho dcayşo bıha gawno di mardutho

U rişono di marcitho d’Mawsal di cito Kaldoyto d’Bobıl hasyo Mor Nejib Musa, mawdacle dlaybe u lo haylo djobır i noşutho dcayşo bu telolo di mardutho dıha gawno. Bebzabno hasyo Nejib sımle qroyto lu Huyodo d’Urifi dımcadır i fnitho d’Bethnahrin dhawyo wahdo lu cnufyo.

 Megabo hreno, mşatıs dafo du nawlo xıd platform du tboco froso dıkmaqwe anesore kenşoye bayn du camaydan dıkhoye ucdo bi daşto d’Ninwe u dkıtyo bi golutho.

 Cali zminutho du grub di hiyoyutho u di demoqratoyutho bu parlamento d’Urifi,  u rişono di marcitho d’Mawsal di cito Kaldoyto d’Bobıl hasyo Mor Nejib Musa sımle mamlo bu parlamento d’Bruksel, bi cohnutho dmaqbele i mraşhonuthayde lu şukono d’Saxarov da zedqe noşoye.

Bu mamlayde, hasyo Nejib mawdacle dılayt mkono dmıjboro i noşutho dcayşo lfuth mardutho dıha gawno, u mawxa klozım dmitaqwın atimoyotho du şbuqyo u du teqbilo du mqabıl. Hasyo Nejib mawdacleste dgımdawım dfolıh cama gabe kule, bnişo dmaxlıs lo balhude i yortutho Mşihoyto d’Bethnahrin mi marıhbonutho dı Dacış, elo u barnoşo di fnitho wi yortuthayda gawonoyith.

Bebzabno, u hasyo di cito Kaldoyto mawdacle di mraşhonuthayde lu şukono d’Saxarov kımathlo gado lu fulhono laşan hıdo sbutho, u mırle “lıkıbcina dqıtlina amarıhbone, elo dsaymina u hurorathe ma renye catume mşawhıre dkıtlın”.

Camgabıdathe, hasyo Mor Nejib Musa sımle qroyto lu Huyodo d’Urifi laşan dfolıh li mcadronutho di fnitho d’Bethnahrin dımşahılfo ucdo l’dargışto du cnufyo bıthır mıdkıtwa dargışto di mdinoyutho.

Megabo hreno u bu snodo du şutoso Amerikoyo du quyomo emwothoyo, grub dı clayme hfite du camaydan di daşto d’Ninwe mşataslın dafo du nawlo bu ışmo d’Olive, bnişo dhuyo geşro dıkmaqwe anesore kenşoye wa cyode marduthoye bayn da nabne du camaydan dıkhoyın ucdo bi daşto u dkıtne bi golutho. İ dafathe kmıhşowo xıd platform du tboco froso, dıkforıs vidyowiye cala haye gawonoye ba qıryawotho di daşto d’Ninwe u cala mawhabyotho dkıtla i claymutho.

Laşan u fulhonano dmisım b’şıkıl towo, u şutoso d’USAİD mqadamle kamerat hathe, laptope u makinat da bahre, bnişo dmişawşıti amkone du fulhono, udmitayıb arşiv ulsoyo dıkhobış b’gawe i yortutho da Mşihoye u di daşto d’Ninwe gawonoyith.

Ucdoste bıthır mıdfayito i dafo d’Olive lu facebook, lu youtube u l’anestigram, aclayme hfite du camaydan kıbci dımşahılfila lı şırke rabtho du montaj bu snodo momunoyo du şutoso Amerikoyo d’USAİD.