Xanıme Kangus nqilo ma hayani mi cıltho du virus di Corona

Xanıme Kangus Mala Dere dtafiwola u virus d’Corona, athmıl bi bethkrihe d’Almelo d’Hollanda nqilo ma hayani.

Xanıme Kangus Mala Dere 25 bu yarho dşafıc nafıqwo u test dida di corona pozitiv. Calathe mahto şabtho bi qarantina bi qelayteyda. Elo u virus kul dathi mawqarle u kewo acla u haw qudrowa dmaydo nafas. Mawxaste 01 bu yarhano nqilo li bethkrihe, elo a mudaxalat dsimi kule lo manfaclın.

Athmıl falge dyawmo nqilo ma hayani. Xanıme Kangus Mala Dere mawlıdo ban 1932 bi qritho d’Zewiga Xaşo dkityo cayid d’Batman. I bartho d’Rihan u Arakel Destijiwa u kıtwola ha ahuno Tajdin.

Gawiro ban 1950 cam Rizko Kangus Mala Dere u hawiwola mu zuwoğano 6 abne u 4 bnotho dkıtne cayoşe mbarbıze b’Urifi. I slutho du cufoyeyda, Yawme dı tıre 12 bu yarhano bi şoctho da 13.00 dfalge dyawmo bi dayro d’Mor Afrem d’Hollanda gıdmisomo.

Gawonoyith hani 2 şabe, a gedşe di Corona zayidi ğalabe b’Hollanda, dilonoyith beyn du cameydan dıkhoye b’Hengelo u Rijssen. Calathe a citotho xıd tedbir sxiri. I şultonuthoste mahıtla dubore hathe leşan i Corona. Mathlo a hage wa meştawotho maklın wa munasabat ulsoye xıd cufoye, beroxe u ğer bu zyudo 30 farsufe kibe dlutmi se hıdode.