Hawi hjomo cal radayto d’Emwotho Mhaydotho b’Barıtle

Sim hjomo cal radayto di mcadronutho noşoyto d’Emwotho Mhaydotho qariwo li mditho Suryoyto d’Barıtle bi daşto d’Ninwe.

 Calathe, a mathlone d’Emwotho Mhaydotho dkıtne bu Iraq krıhlın u hjomano, u mawdaclın dıkmacıq a’fulhone di mcadronutho da banymothoye du Iraq.

 Athmıl safrayto foquctho dımahto bi arco, mfarqıco qariwo mi mditho d’Barıtle calu darbo beyn da mdinotho d’Mawsal u Arbil. I foqucthathe mfarqıco bu zabno dşafico radayto di mcadronutho noşoyto d’Emwotho Mhaydotho, u bi netije du furqocano mjarıh ha ma fqide di tahrazto tibeloyto da muklone.

I mathlonutho d’Emwotho Mhaydotho bu Iraq UNAMİ bu buyono dıfrısla lu tbocofroso mawdacla, di mathlonitho dilonoyto du notarrozo gawonoyo bu Iraq Jeanine Hennis Plasschaert, krıhla b’qaşyutho uhjomano, u mırla; u medano kımacıq a fulhone di mcadronutho dkıtyo u camo du Iraq sniqoyo ela.

Camgabıdathe, imşalonitho dcala sebwotho noşoye d’Emwotho Mhaydotho bu Iraq Erina Solyorano bu hfuxyo dmahwela mqabıl du hjomano mırla; A şutose noşoye hfite ğalabe naqlat kfulhi ba dukotho dkibın qento u ksaymi u mede dıknofıl aclaye leşan dımcadri a sniqoye. Uhjomano b’şıkıl qriho kmamte l’bolayna u qento dıkloqın kul yawmo.