HBA frısle buyono calu yawmo şatonoyo dahjome dsımle Dacış

U gabo du Huyodo d’Bethnahrin Athroyo-HBA du Iraq, mathkarle u yawmo şatonoyo du qtolğenso dsımle u tukoso marhıbono d’Dacış calu camo Kaldoyo-Suryoyo-Othuroyo di daşto d’Ninwe.

 Bu buyono dırısle HBA huwle şudoyo, dgımdawım u ağunayde hol dmitahwele u camaydan a zedqayde kulle, u dhoye bı neshono bu cafro dan abohothayde.

U gabo du Huyodo d’Bethnahrin Athroyo-HBA, frısle buyono lu ray gawonoyo dıbritho bi cohnutho da 6 eşne du qtolğenso dsımwole Dacış 6 bu yarho d’Ob da 2014, bu zabno dhjımwole cala comure di daşto d’Ninwe, u hawiwo celtho du camaydan u Kaldoyo-Suryoyo-Othuroyo dıkmotewo u menyonayde l’120 alfo farsufe, dımgalwın ma mdinothayde uma qıryawothayde a makthabzabnoye di daşto d’Ninwe.

Cıl mu haşo dcayışwole u camaydan di daşto, elo naqla hreto HBA mawdacle du qtolğensano trewole u ağunayde dımhalıq dawsat u dımşatıs haylo ma Mharbone dmıştawtafwolın lu qrobo mqabıl Dacış, uba cuqobe du huroro di daşto d’Ninwe. HBA bu buyonayde makadleste du ağunayde xıd gabo gdımdawım cama gabe hrene du camaydan dıkmawdıc bu şetoso dı Mdabronutho yothoyto lu camaydan bi daşto d’Ninwe yaste hiğmonutho dgıdmişahılıfo bıthır l’qlimo lfuth u mluo da 119 du nomuso esonoyo du Iraq.

Ubebzabno, HBA makadle dgımdawım u ağuno leşan dmitahwe tazminat la yaqrotho da Sohde, da mvayace wa galwoye du camaydan, u hawxa mdawamle Llıktocinaste u ağuno mşawtıfo dcama ahunone Ezidoye, u gıdobina ağuno lawğıl u larwal du Iraq dilonoyith b’Ewmotho Mhaydotho uban athrawotho rabe dıbritho hol dmişarıri a zedqe du camaydan bu haqlo umthoyo u athronoyo.

Camgabıdathe, HBA bu buyonayde sımle qroyto lan abne du camaydan dkıtne bu Iraq u bğer athrawotho, dmıştawtıfi lu ağuno mhaydo, u dımqadım nafşe ya azuzayde yaste u tboco frosayde leşan i mşablonutho di sbutho umthoyto du camaydan d’Bethnahrin. Bu tarano u buyono grışle u zuhoro cal HBA dımhalaqwole dawsat msimone cam 7 gabe hrene du camaydan xıd mathlo u lumodo d’Bruksel dımtayabwo bu yarho d’Hzirın da 2017, uba fusqone dmıdwole qadırwo dmaqnıc ğalabe athrawotho Urifioye u d’Amerika bu ğamo du camaydan wu şroyo du şwolayde.

Camgabıdathe, HBA tlıble man abne du camaydan dlo msanti cal kull farsufo, şutoso aw haylo dkobıc dmohe dharbo lu ağuno du camaydan bu darbo du tboco froso cjiqo awste bi propaganda dıkmisomo bnişo dmifarfıs u camaydan me hdode u dhowe fako la bceldbobayde. HBA mırle’ste; Bı şubhoro kımmina, hani a mahırwone dlo rığşiwo du ağunaydan hawi mathrono cali siyase cjıqto dıkmaşanla, lıgsaymiwo i kampanyathe mqabıl didan. U kımmina lani dkıtne saqıbloye lu ağunayda, ida kmahwetu saqıbloyutho lu ağunaydan, qay lıkobitu alternativ hreno yaste tahrazto hreto me darbe?.