HBA mtayable hfitutho bu yawmo du duxrono da sohde du ağuneyde

U gabo du Huyodo d’Bethanhrin Athroyo mathkarle u yawmo şatonoyo da Sohde du Mawtbo Umthoyo d’Bethnahrin bi hfitutho dımtaybole bi nuqazto di Mtakasto d’Kaldo Aşur dkıtyo b’Caynkawa.

 Bi fituthathe mqadım mamle cali mıcne du yawmano u qıre mimre u mahwe falqo d’video, dıkmahke cala Sohde d’MUB dhulın a hayathe qurbono leşan i hirutho du camathe.

HBA du Iraq bu yawmo şatonoyano mtayable i hfituthathe da sohde, leşan dnufqi moro la sohde du ağunayde u dmahıtlın a hayathe qum du camathe. İ hfituthathe dsimo bu qentrun di Mtakasto d’Kaldo u Aşur b’Ankawa mşarela b’qatinto d’şetqo cali ruho da sohde d’MUB u du cameydan, camu falqo musiqi di zugitho athronoyto u di hirutho l’Bethnahrin.

U futoho di hfituthathe dsimo mu gelyunoro Salah Sarkis mcazamwole tıre tloye dkıtwın lwişe lıbuşe marduthoye du cameydan u dı tcınwolın i sırto da sohde u bıthır macızmo Meryem Cimad i mşalonitho di Mtaksonutho da Neşe d’Bethnahrin dımqadamla mamlo, dmahkela cala rdufye wa qatle dsimi calu cameydan u Othuroyo-Suryoyo, dhawın celtho du cameydan dmıjbır dımgalwe ma dukothayde.

Bıthır mathe u rişono du gabo du Huyodo d’Bethnahrin Athroyo Yusuf Yahkub Matte mqadamle mamlo dmahkele ebe i mıcne di sohdutho u bebzabno mqadamle egartho la Ağuniste u egartho lu cameydan Kaldoyo-Suryoyo-Othuroyo bu maşıqlano dkıtyo ebe, dnofıq moro la ağre dkıtle u dımdawım u ağuno di hirutho du cameydan.

Bıthır ma mamle dhawın calu yawmano, omuro Behnam Cattalah me Bağdede u Amir Bulus me Barıtle u tıre ma hadome du Mawtbo Umthoyo d’Bethnahrin Sabah Barxo u Ramzi Yakoste mqadamlın mamle u mimre calu duxrono da sohde.