MUB frısle buyono bi cohnutho du duxrono şatonoyo da sohde du ağuneyde

Ba mele ‘A Sohde Umthoye di hirutho d’Bethnahrin, kgurşi i rişonutho du ağonaydan’ kımşare u buyono dıfrısle u Mawtbo Umthoyo d’Bethnahrin (MUB) bi cohnutho du duxrono şatonoyo da Sohde du ağunayde.

 MUB mırle; Leşan haye b’nıshono hulan qrobo mqabıl da hayle catume dkıtne bcelıdbobe di noşutho u hawilan ba casrowat sohde. A Sohdeydan bi fedekariye du nfoqo du moro la timoyotho u li hiyoyutho du camaydan trılalan yortutho u duşno rabo.

 U buyono di Sictho di Rişonutho d’MUB ba melani kımşaryo bu buyonayda; Bi cohnutho d’10 Teşrin u Qadmoyo dkıtyo u yawmo du duxrono da sohde dbıhlın a hayathe bu ağuno du Mawtbo Umthoyo d’Bethnahrin, kıdorina a şlomaydan la eqaryotho da sohde u lu camaydan u mothonoyo. 10 bu yarho d’Teşrin u Qadmoyo di şato da 1999 u kerwanaydan da sohde dnafıq lu darbo cama Abgare, kımdawım dmanhır u darbaydan u dımqarawlan la nişeydan.

A Sohdeydan bi fedekariye du nfoqo du moro la timoyotho u li hiyoyutho du camaydan, trılalan yortutho u duşno rabo. Kul sohdo ağro bu ağunaydanyo, madraşto da hayeyo dmitawfıq herge trise mena u falsafe dhaye b’nushone. İ wolitho asasi du Mawtbo Umthoyo d’Bethnahrinyo dmacış a cuhdone wi lhiqutho dkıtwolın a sohdeydan dı dbıhe i nafşathe bu qrobo dhulın mqabıl da hayle mıştacmırone, du tukoso marhıbono d’Dacış u da bcelıdbobe du camaydan u Suryoyo-Othuroyo-Kaldoyo-Oromoyo; leşan haye demoqratikoye u hire.

U camaydan bu athro u bi golutho kul dnofıq moro la sohdeyde dbızze u admathe u dhulın a hayathe leşan du dactith dide, gıdqomır haylo u yuqro. Calathe i naqa a falqe du camaydan kule, a şutose u tukosayde dmowfıqi li idactho dnıfqi moro la sohdathe, dmafiti li harake amkonathe maddi u macnawi leşan du nişo da sohde, dımtaksi a dinamikathe a umthoye wa kenşoye, gıdqımrina.

Calathe u ağuno dıkbena bu haqlo folitiqoyo, tukosoyo, folhoyo wa haqle hrene cısyonoyo mqabıl du tenkiro, du lıhoyo u di lo kinuthoyo. Midıd ban alfayo ma abne du camaydan dılo hawbo u dılo htitho mafiti mu qtolğenso. Cal dımtakaslan delqublo, b’nişo dnıfqina moro li hiyoyuthaydan, li marduthaydan uclu nıshonaydan mqabıl di zıhniye dıkmaydo nişo qulnaqla u camaydan, hulanste badale rabe.

Ksaymina qroyto lu bınyono du Mawtbo Umthoyo d’Bethnahrin u lu camaydan u mothonoyo bkul duktho bi cohnutho d’10 Teşrin u Qadmoyo dmathkıri  a sohde di hirutho, u bu nişano dsaymi hfitwotho. B’iqoro kmathkırina a sohdaydan u kmaczımina kul noşo dımtakıs u haylayde bi rişonutho du Mawtbo Umthoyo d’Bethnahrin. A sohdaydan kmanhıri u darbaydan u kobın haylo lu ağunaydan.

Tihe u ağuno umthoyo di hirutho dıkbenale bi rişonutho da sohdaydan

Tihe i Hdoyutho Umthoyto du camaydan.