Hfuxye mqabıl da gedşe du cnufyo dkowın bi hiğmonutho d’Suweda, Suriya

BRITHO — I tahlufto du mathlono dilonoyo d’Emwotho Mhaydotho b’Suriya Najat Ruşdi, mahhwela ilothnihutho rabtho dkıtla ma taşrore dıkmaglın cala gedşe du cnufyo udu htofo dkowın b’Suweda ucalu qatlo d’menyono celoyo d’mdinoye. 

Ruşdi bi maqırhonutho dıfrısla, tlıbla mi şultonutho zabnoyto dı Darımsuq uma şutose gawoye d’Suriya dımhalqi baroyo dawsat laşan du sutoro da mdinoye, du terkiwo di şalyutho udu mnoco di fıtne. 

I mşalonitho emwothoyto makadla ste i sniqutho rabtho dkito dmıbne u tuxlono udmisım diyalog, bnişo dmihalıq dawsta lafqudmo laf maşıqlo folitiqoyo hatho u rwiho dıkmıştawtıfile a’came d’Suriya kulle, udkıtyo mşatso cala prensibe di şaryutho, di morutho udi mşaynutho qlimoyto. 

Camgabıdathe, i konfedraliye da tukose du kenşo demoqratoyo du garbiyo udu madınho d’Suriya, bu buyono dıfrısla mawdacla du hçomo dıkmisım cal Suweda latyo balhude hçomo cala Druz, elo hçomoyo ste dkımhadıd a’gade du diyalog udu lqoyo bayn da came u gawne mşahılfe d’Suriya. I konfedraliye matcanla ste i şultonutho zabnoyto dı Darımsuq i mşalutho du mede dkowe b’Suweda mi celtho di siyase du dyoşo dkımmaşyola mqabıl da talabe ruşmoye da Suriye. 

Bebzabno, i konfedraliye makadla d’Suriya u dactid klozım dhuyo athro demoqratoyo lo qentrunoyo dkıtyo banyo cal gawne frişe, şawyutho u neshono du barnoşo, athro dıkhodın an’abnayde kulle dlo dişutho. 

M’gabo hreno, u waziro du sutoro d’İsroyel Yasra’il Kats mawdacle du gayso İsarloyo hçımle cal tanqat ucal nişe folhoye bu taymno d’Suriya xıd egartho qrihto d’zuhoro lu rejim dı Darımsuq. Kats mırle ste “lıgıddobina fsoso l’noşo dgoyış a’Druz d’Suriya. İsroyel lıgıdfayşo şlitho”.