21/07/2020

Hfuxye mqabıl d’Turkiya calu gboşo dıkseymo

U koalisyon d’Alfatıh bu parlamento du Iraq, tlıble mi şultonutho d’Turkiya dmıgroşo baroyo mu garbiyo du athro, u mzaharleste d’Turkiya dkıbco dımşatso bu Iraq şuro di mşaynutho xıdu mede dsımla bu garbiyo d’Suriya.

 Megabo hreno, qoyumo Armınoyo bu parlamento d’Turkiya tlıble mi şultonutho d’Erdoğan dlımaqşiyo i mwatyutho dkito ucdo cala thume beyn d’Armenia wu d’Azerbaijan.

 U koalisyon d’Alfatıh dkıtle sagiyutho d’kursiye bu parlamento du Iraq, mahwele ilo thnihutho rabtho dkıtle mu kboşo Turkoyo calu garbiyo du athro u dıkmote naqlat l’cımqo d’25 kilometre bıgawe dan arcotho Iraqoye. U koalisyon d’Alfatıh mzaharleste d’Turkiya dkıbco dımşatso şuro di mşaynutho bu garbiyo du Iraq xıdu mede dsımla bu garbiyo d’Suriya.

U rişono du koalisyon d’Alfatıh Hadi Alcamiri mzaharle cali tahraztathe d’Turkiya, u tlıble mi şultonutho d’Ankara d’baroyo dnufqo man arcothathe. Alcamiri sımle qroyto li şultonutho d’Boğdod dşufco li harake u dmaydo tedbire folitiqoye leşan dmatimo u kboşo d’Turkiya calan arcotho du Iraq, u dnıqlo i sbuthathe lu Huyodo Caraboyo, lu tukoso du lumodo Maşılmono ula platforme Emwothoye.

Alcamiri mırle; A hayle athronoye du Iraq kulle klozım dımbayni klayto mhayadto, bnişo dmınfıq moro li morutho du Iraq u dmitaklın a dyoşe dkowın acle. Me gabo hreno, u qoyumo d’HDP bu parlamento d’Turkiya Garo Paylan, tlıble mi şultonutho d’Erdoğan dlımaqşiyo i mwatyutho folhoyto dkito ucdo cala thume beyn d’Armenia u Azerbaijan. Paylan bi rmoyto dımqadamle mşayele lu waziro di baroyutho d’Turkiya Mevlut Çavuşoğlu, calu snodo d’Turkiya l’Azerbaijan, u mamtele lu bolo d’Turkiya dkıtyo hadımto bu grub d’Minsk du tukoso di Mşaynutho udi Methcadronutho d’Urifi dımqadmi bha kaylo la şuşote haroye dkowın cala thume beyn da 2 athrawothani.

Mxasra hreto, u mufti gawonoyo d’Mısır Şawqi Callam mawdacle du fusqono dmıdla Turkiya bi sbutho du şuhlofo d’Ayasofia l’masığdo latyo ruşmoyo lfuth i şarica Maşılmonitho. Şex Callam bi maqırhonutho dhule lu tbocofroso makadle dıklozım dmınfıq moro la citotho xıd kıtne u lıkowe dmişahılfi l’masığde, u bebzabno lıkowe a masığde dmişahılfi l’citotho. U mufti d’Mısır mırle’ste; Layto manciye dmıbnoyi a citotho ma zuze da Maşılmone, u makadle dkito amro da Maşılmone dnufqi moro la citotho.

Check Also

YPG maglela cali hiyoyutho da Sohde dmahrawla Turkiya wa marhıbonayda a bethqburathe b’Cafrin

Bi maqırhonutho dıfrıslın a Haylawotho du sutoro du Camo-YPG, maglelın cali hiyoyutho da S…