Hın ma folitiqore d’Almanya tlıblın dmitadcıri a galwoye dıkmaşın gunhe lanathrawothathe

Bıthır mıd zayidi a hawbe du qatlo wa hçome marıhbone b’Almanya, hın ma folitiqore tlıblın dmitadcıri a galwoye dıkmaşın gunhe, lanathrawothathe.

İ folitiqorto du gabo d’SPD d’Almanya Franziska Giffey, bi maqırhonutho dhula mawdacla, du sutoro da bnaymothoye, zedqo cleytır mu sutoro d’farsufe dıkdayşi a zedqe da hrene’yo.

A qroytotho dıkmisomi b’Almanya leşan dmitahwe fsoso dmitawfıqi a galwoye dıkmşakli qento li mşaynutho gawoyto du athro, kımdawmi dxulqi jğuşyo beyn du kenşo Almanoyo-kull naqla dıkmıthım galwoye b’hçome marıhbone yaste b’gunhe du qatlo aw du teçawız.Elo bebzabno kmisım’ste qroyto me folitiqoye Urifoye, leşan dmişahılfi a qonune du Huyodo d’Urifi bi sbutho di galwoyutho.

İ folitiqorto du gabo da Sosyal Demoqratoye d’Almanya dkıtyo bu koalisyon di şultonutho-Franziska Giffey, sımla qroyto dmitawfıqi a galwoye d’Afğanistan ud’Suriya dkıtne qento li mşaynutho gawoyto d’Almanya, u dımthabıt dsımlın hçome marıhbone aw gunhe hrene.

Giffey dkıtwa meqım i wazirto dcala sebwotho di iqartho bi şultonutho d’Angela Merkel, bi maqırhonuthayda mırla; Ono qrıhtono bi sbuthathe, klozım a marhıbone dıkmşakli qento u dıkmhadıdi i mşaynutho dmitadcıri lan athrawothathe. İ naqla dıkmahızmi a bnaynoşo mu qrobo umu shofo-klozım aclayna dımcadrinalın.

Giffey mırla; Elo u farsufo dıksoyım gunhe, teçawuze yaste kıqotıl-kmimıd mene u zeqdo di galwoyutho. B’hawxa aykanoyutho u timo du sutoro da bnaymothoye d’Almanya klozım dhowe yaqırtır mu sutoro d’farsufo dıkdoyış a zedqe da hrene. Almanya kımdawmo ucdo ba fulhone du tedciro da Afğanoye dıktulbi dmitahwelın u zedqo di galwoyutho.