Hiw amro mu Mit d’Turkiya dmisım suikast cal folitoqoroyto Aslan

İ qoyumto dmeqım bu parlamento d’Austurya folitiqoyto Perivan Aslan, makadla du ğoşuşo Turkoyo dkıtle ğensoyutho İtaloyto Fayyad Özturk mıctarafwole dathiwole amro ma istixbarat du Mit dı Turkiya, dsoyım cali folitiqoyto Aslan suikast du qatlo u acmaste folitiqoye hrene b’Austurya.

 İ maqırhonuthathe d’Aslan athyo luhwoyo bu zabno dmawdacla i şultonutho d’Viyana dgıdmawfıqo u ğoşuşo Özturk manarcotho d’Austurya.

 İ qoyumto dmeqım bu parlamento d’Austurya folitiqoyto Perivan Aslan, thımla anistixbart du Mit dı Turkiya dkıtne bıthrıd di tahrazto du qatlayda cam folitiqoye hrene b’Austurya.

Aslan bi maqıblonutho dsımla cami dafo d’Alcarabiya Net mırla “u ğoşuşo Turkoyo Fayyad Özturk bu zabno dmaslamwole ruhe meqım yarho li şultonutho d’Austurya, mıctarafwole dkıtwole nişo dsamwoli swikast du qatlo cam tre folitiqoye hrene Peter Pils wu hadomo bu parlamento d’Urifi qoyumo Andiriyas Shider. Özturk bu yarho d’Ob dşaficina mıdwole amro ma n’istixbarat Turkoye dsoyım a’swikastani du qatlo”.

Özturk mawdacla ste dhiya xıd farsufo bi qadmoyutho di tahrazto da swikaste wa, cal dkıtyo bu şerşo Kurdoyto, u mqabıl di siyase dkımmaşela Erdoğan yo, u hawxa

mdawamla “u dawro dkıtla Turkiya ba tahrazyothani da swikaste latyo ftiho, cal dıkmisomi b’ğnizutho kamılto, ulo athro ste kibe dmagle calu dawro Turkoyo, elo u mede dkımthabıt dı Turkiya kıtla sawco ba swikaste, a’tre sniğre du ğoşuşo d’Özturk ne dkımnasın bu haylo dkıtlın dımbarın an’istixbarat Turkoye bi sbuthathe. U medano kamhıt othwotho d’şuwole ğalabe. Xıd mathlo manyo dkobe zuze la tre sniğrani mqabıl di mudafaca dıksaymila dilonoyith du mqimdino gawonoyo d’Asuturya sxırle a’hşowe dkıtle u ğoşuşo ba bankat”.

U bethdino du ğoşuşo Turkoyo Fayyad Özturk, kmıntır arbıco bu yarho d’Şbot dıbqamuthayna dmisım, u kito ste texmin lfuth i sniğarthayde dmitadcır zabnoyith l’Austurya bıthır mu tewfiqayde ma n’arcothayda. İ sniğartho d’Özturk Veronika Oyvarossi, bi maqırhonutho dhula lu ajans d’Frans Press mathkarla di şultonutho d’Viyana mawdacla d’Özturk kımmathıl qento cali mşaynutho gawonoyto du athro, mawxa ste meqım mu cedo du mawlodo mawbewola la thume d’İtalya.