Hiw u fağro qamoyo la nacime di marcitho Kaldoyto d’Mor Yusuf

Bi mdito d’Boğdod bu Iraq, hiw u fağro qamoyo la nacime di marcitho Kaldoyto d’Mor Yusuf.

U zawho du tehwiyo du fağro mqadşo mrayaşanle i qadişutho du fatıryarxo Mor Luwis Rofayel Qadmoyo u Sako, u mıştawtaflele a kohne di marcitho wa yaqrotho da nacime dımqadamlın lu rozo du fağro mqadşo.

Athmıl safrayto, i qadişutho du fatıryarxo di cito Kaldoyto d’Bobıl Mor Luwis Rofayel Qadmoyo u Sako, mrayşanle u qurobo alohoyo du tehwiyo du fağro qamoyo l’18 nacime yolufe u yolufyotho bi cito d’Mor Yusıf dkıtyo bi fnitho d’Alkarrada bı Boğdod.

Camgabıd di gudo du koral di cito, mıştawtafle lu zawhano a’kohne di marcitho Nadir Dakko, Hanna Qılo, Firas Domenik u Minhal Sallum wa yaqrotho da 18 nacime.

Bıthır mu zuyuho dsim mu ikliros di cito cama 18 nacime hedor di cito, Mor Luwis Sako bu mamlo dsımle mhanele a’nacime bu yawmano dımqadmi ebe lu rozo du fağro mqadşo, u mşaçcile dımdawmi d’othın li cito bnişo dmaqwın an’esoraththe cam Moran Yeşuc Mşiho.

Bıthır mathe Mor Luwis Sako grışle u zuhoro cali ulsoyutho di tarbitho u mırle “u ahıl kıtlın i mşalutho dımcaqbi b’hubo ub’hexamtho i tarbitho da nacimaththe, dilonoyith ba şartat casqe du maşıqlano ducdo, ubu zabno dıkbışlın a’dafe du nawlo kul mede ba haye”.

Bu huthomo du mamlayde, fatıryarxo Sako mşaçacle a’yaqrotho du camaydan dmamtın zıd m’tre nacime, u tlıble ste m’Aloho dmahıt a’burkothayde b’gawıd du kenşo Mşihoyo du Iraq.