Hiw u qurbono qamoyo l’50 nacime mu camaydan dıkhoyın ba qıryawotho mşahılfe dkıtne hedor di dayro

Bi dayro d’Mor Matta di cito Suryoyto Ordodoksoyto di daşto d’Ninwe, hiw u qurbono qamoyo l’50 nacime mu camaydan dıkhoyın ba qıryawotho mşahılfe dkıtne hedor di dayro.

Camgabıd da yaqrotho da nacime, mıştawtafle ste lu zawho du tehwiyo du qurbono mqadşo hsayo, kohne u dayroye di cito Suryoyto.

15 bu yarhano dkıtwe u duxrono du cedo d’Yuldath Aloho, u rişono di dayro d’Mor Matta zadiqo di cito Suryoyto Ortodoksoyto hasyo Mor Timothawos Musa Alşamani mrayşanle u qerowo alohoyo bi cito di dayro dıknofıl bu turo d’Maqlub bi daşto d’Ninwe.

L slutho du qerowo mıştawtafle ste u mşawrono fatıryarxoyo hasyo Mor Ğriğoryos Saliba Şamcun, u kohno di cito d’Mor Zakay qaşişo Zakay Yacqub, a’dayroye d’Mor Matta zadiqo u menyono celoyo dımhaymne dkıtne ma comure di qritho d’Merge ud’qıryawotho hrene u kunoşe dkıtne hedor di dayro d’Mor Matta.

Camgabıd du şahro d’Meryam, 50 nacime abne u bnotho du camaydan mqadamlın lu rozo du qurbono mqadşo bıthır mdımkamelın i dawra du yulfono ruhonoyo. Bu zawhano, a’nacime maşmaclın a’hadire qole basime du tekso citonoyo, ubıthır hew elaye u qurbono mqadşo cama qole da hılhole da neşe.

Hathe inaqla qamaytoyo dıkmitahwe eba u qurbono mqadşo la nacime bi cito di dayro d’Mor Matta zadiqo di daşto d’Ninwe.

Hasyo Musa Alşamani bu mamlo dsımle, mahkele cala haye d’Yuldath Aloho u kali cali usloyutho du rozo mqadşo du qurbono, u mqadamle ste a’tawdiyothayde l’qaşişo Zakay ula malfone di dawra ruhonoyto da nacime.