Hjomo cali cito d’Mor Elias: sim taglitho bi Bruksel u slutho bi dayro di Einsiedeln

BRUKSEL /EINSIEDELN, Swisra — 22 bu yarho dı Hzirın bu hjomo marhıbono dsımwo cali cito d’Mor Elias b’Darımsuq d’Suriya zıd me 25 farsufe mvayacwolın a hayaththe, wu medano maglele u haşo, i tahluka dkito cala came Mşihoye du qlimo du Madınho Mıscoyo. Calathe a şutose tukose du camaydan ba mdinotho mşahılfe d’Urifi kımtaybi hfitwotho u gırşi u zuhoro cala tehdite dkito cala Mşihoye. Calathe a şutose tukose wa citotho du camaydan mtayabbe hfitutho bi Erışkayto d’Beljika bı Bruksel.

Bi hfitutho dsimo 13 bu yarhano dı Tamız Yawmıd Huşabo dhadırla ba mowat d’camo sim mamle mu Huyodo Suroyo d’Urifi ESU Meryem Vergili, mi Cito Suryoyto Ortodoksoyto Hasyo Mor George Gawriye, mi cito Suryoyto Katholikoyto Thomas Habbabe, mi cito Malkoyto Ortodoksoyto Qaşişo Ishaq Sade, mi Cito d’Madınho Othuroye Khano Kanun, mi Mtakasto Othuroyto Demoqratoyto Ninorta Shabo, mathlono da  citotho Qatholikoye dı Beljika Benwa Lano, umu gabo dez Angaje Jon Lui.

Bi maqırhonutho d’ESU sim qroyto la came mşhiye mir “ahna ktıcnina ışmone mşahılfe, kımsalena b’citotho frişe elo kıtlan makthabzabno u qadar mşawtıfo” Simste qroyto la fatıryarxe, la kohne ula gabe folitiqoye li hdoyutho u mir “ida dlo mihaydina gıdtaymina.” Simste qroyto lu ray dı britho u tlib u hjomo dcali cito d’Mor Elias dmisım u buqorayde me komisyon emwothoyo u şaryo. Dmişatıs mekanizma du sutoro bu qlimo u dmitahıt klayto qrıhto emwothoyto mqabıl da grube radikal.

Bi maqırhyonutho dmir “basyo”, mamte lu bolo u qtolğenso du Sayfo dsim meqım 110 ışne, sim qroyto di hdoyutho dcayşi camıhdode bu cafrano b’neshono, b’hirutho ubı şlomo.”

Ba mamle dsim cal ışmıd du camaydan Suryoyo – Othuroyo – Oromoyo – Kaldoyo – Maronoyo a melani grışlın u zuhoro “ahna u camo şurşoyo du athranona. Ktılbina zedqo dcayşina bu cafraydan da abohotho.”