HNB sımle u lumodayde di şato bi mıştawtıfonutho da hadomeyde bu athro u bi golutho

U Huyodo da Neşe d’Bethnahrin-HNB, sımle u lumodayde di şato bi mıştawtıfonutho da hadomayde dkıtne bu athro ubi golutho.

Bi tahrazto du lumodano dımtayıb adyawma bu darbo du nawlo, sim u futohayde mi rişonitho d’HNB u qıryo i egartho dımşadarle u rişono gawonoyo du Mawtbo Umthoyo d’Bethnahrin Nacim Michael Hadodo lu lumodano d’HNB.

Adyawma safrayto, sim u lumodo şatonoyo du Huyodo da Neşe d’Bethnahrin, bi mıştawtıfonutho da hadome uda mathlonayde dkıtne bu Cıraq, b’Suriya, Turabdin ubı athrawotho frişe d’Urifi. Bu futoho du lumodano dsim mi rişonitho d’HNB Şmuni Arsan, mawdıco i tahrazto du yawmoyo du lumodano u bıthır kle qatınto d’şetqo cali ruho da Sohde du ağono umthoyo u gawonoyith du camaydan.

Bıthır qıryo i egartho dımşadarle u rişono gawonoyo du Mawtbo Umthoyo d’Bethnahrin Nacim Michael Hadodo lu lumodano u dkali eba, cali aykanoyutho du camaydan ucali ulsoyutho du dawro di athto ba haqle frişe du ağono umthoyo wi rişonutho dıklozım dsaymo bıgawe du kenşo. İ rişonitho d’HNB Arsan, bu mamlayda mahkela calu Mawtbo dımşakele u Huyodo-du nişayde u rişoyo zıttır dmitaqwıyo u dmişawşıto i athto bu haqlo methtaksonutho u dsaymo i rişonutho’yo.

Bu lumodano, friş duktho lu qroyo da taşrore dımqadmi ma wahde kulle u sim u nuholathe u kle cali tahrazto da fulhone dımbayanle HNB li şato dothe, u sim bıthır u nuholayda ma hadire. Bebzabno, qre a egrotho wa message hrene dımşadri ma şutose frişe d’MUB lu lumodano d’HNB, u mqadım renye hathe u mid fusqono aclaye ma hadire.