HRW mawdacla di şultonutho zabnoyto d’Suriya kmaciqo a’fulhone di mcadronutho noşoyto dıkmitasiri b’sisteme biroqratoye dıkdomın la fulhone dıkmisomiwo bu zabno du rejim catiqo du Bacıth

SURIYA – İ mtakasto da zedqe noşoye d’Emwotho Mhaydotho Humen Rights Woch, bu taşroro dıfrısla adyawma mawdacla di şultonutho zabnoyto dı Darımsuq kımtarqılo a’fulhone da mtakısyotho di mcadronutho noşoyto cal dıkmasrolın b’tedbire qaşye biroqratoye dıkmaciqi u funoyo dıkmitahwe li sniqutho noşoyto b’gawıd d’Suriya. 

Humen Rights Woch mawdacla ste dı Darımsuq cıl mıdkobo şudoye di methcadronutho, elo naqla hreto kamfito la haye sistem dkıtwın heş bu zabno du rejim d’Alasad awkith dkobın fsoso dhowın a’mcadrınwotho siyasi udmitasri a’mtakaısyotho noşoye cami şultonutho. 

Bebzabno, HRW grışla u zuhoro cala fusqone hathe dı Darımsuq dıkçıbri a’mtakısyotho noşoye dfılhi laltah du duyoqayda, ubu şıklano lıkfoyış şawyutho bu feroqo da mcadrınwotho wi zalilutho du fulhono kmitaciqo. HRW makadla ste du hethotho d’haykıle d’şutose xdu Sahro Semoqo wi notarrozutho du quyomo d’Suriya lımşahlaflın u jawhar du sistem dkımmaşyole Darımsuq. 

U tahlufo di mdabronitho du madınho mescoyo d’HRW Adam Kugel mırle “ucdo kito aftho dmifarfıs u sistem dıkmacıq u fulhono noşoyo şaryo, uklozım i şultonutho dı Darımsuq dmaqimo a’qayde dkito lo dmahtolın m’hatho”. 

Callathe, HRW sımla qroyto li şultonutho dı Darımsuq dmqimo a’terpılyotho di mdabronutho, udsaymo u garanti dmotın a’mcadrınwotho b’şawyutho la sniqoye. Bebzabno, HRW tlıbla ma n’athrawotho mcadrone dımbayni prensibe şafye, udmaydi hşowo qaşyo m’Darımsuq.