Hungarya mawdacla dkımcadro amşihoye du madenho mescoyo

İ şultonutho d’Hungarya mawdacla dıbnela hul ucdo zıd m’30 citotho dıshifi bu athro d’Lebnon, u alfo bote shife du camaydan bi daşto d’Ninwe bu garbiyo du Iraq.

Hungarya dıgrışla u zuhoro calu kenşo Mşihoyo macırboyo dıkminakıf dımşalıt bahro cala Mşihoye dıkmırdofi bı britho, mawdacleste di mardutho Mşihoyto gawonoyith kmisım acla hjomo mtakso.

Bu zabno dlıkobe u kenşo Mşihoyo emwothoyo funoyo li sbutho da Mşihoye dıkmırdofi bu madınho mescoyo, u athro nacimo d’Hungarya kımhalıq ba malyune dolare bu qlimano, laşan dımcadır bu bnoyo da citotho uda kenşe Mşihoye.

Hungarya u athrano u nacimo dıknofıl bu lebo di qıtca d’Urifi udıkhoye ebe noqıs m’01% ma comure dıbritho, mqadamle mi şato da 2017 uhul ucdo hedor 40 malyune dolare laşan dımcadır a’Mşihoye dıkmırdofi. İ mawdconuthathe hiwo mu waziro da sebwotho baroye udi tagorutho bi şultonutho d’Hungarya Piter Zigarto lu froshezwo d’Foxnews.

Bi maqıblonutho dsimo camu waziro d’Hungaroyo mırle “ahna baroyo kıbena a’zuze la citotho ula marciyotho da citotho. Xıd mathlo madcarlan u bnoyo d’33 citotho shife bu athro d’Lebnon. Ubu qlimo du madınho mescoyo bnelan mdinotho u madraşyotho da kenşe Mşihoye, baynothaye u bnoyo d’alfo bote shife bi daşto d’Ninwe. Lfuth a’şartat ducdo ubu zabno dıkmitahıt casqıwotho rabe b’qamuthayna ub’qamuthıd du Huyodo d’Urifi klozım u farsufo dmıjğıl udfotıh feme. Ahna bu maşıqlano ducdo mbayanlan laşanayna u darbo di mcadronutho da Mşihoye dıkmırdofi, wu teqwiyo da timotho Mşihoyotho”.

U waziro Zigarto bi maqıblonutho dsimo acme, mdafacle u mamlo dsımwole u rişwazire di şultonuthayde Viktor Orban dmırwole “i marduthaydan wi mdinoyuthaydan kmisım acla hjomo mtakso, lo belhude b’Afriqya ubu madınho mescoyo, elo harkeste b’Urifi dkıtyo u cafro di mardutho Mşihoyto makışronitho dkulle”.

Zigarto mawdacle du rişwazire Orban kmisım sturyo cal dkımdafıc a’sebwotho mnatrone di Mşihoyutho, u hawxa mdawamle “i umtho dlıwela şubhoro bi hiyoyuthayda i umthoyto, udluyo masırto cami yortuthayda i marduthoyto wi tawdithoyto makthabzabnoyto layba dhuyo umtho qwitho. Bi siyase tibeloyto kmitacmıs cayno cali şarirutho da Mşihoye dkowın nişo la rdufye. A’rişone da Maşılmone bılhiqutho rabtho kımbahsi cali casqutho da camatathe dıkmiqadamlın b’şıkıl lo towo, elo a’rişone da Mşihoye kminakfi dımşalti bahro cala Mşihoye dıkmırdofi. U kenşo emwothoyo lo bhasasiye kımqadım li sbutho da rdufye dkowın cala Mşihoye”.