01/07/2020

İ cito d’Mor Codişo kmınfaqla moro ma comure Yezidoye

I cito d’Mor Codişo dkıtyo bi qastra d’Alqoş ksıhdo li ithutho Mşihoyto du camaydan bi qritho d’Nasira dıkhoyın eba a’Yezidoye.

 I citathe dıkdocır u makthabzabnayda lu doro da 18, kmınfaqla moro ma Yezidoye uksaymila qul naqla socurutho laşan dmaydi i boruktho mena.

 Me zabno d’casrowat d’ışne, u camaydan dıkhoyewo bi qritho d’Nasira bi qastra d’Alqoş di daşto d’Ninwe, jbırwo dmaxle i qritho u trewole bıthre cito dıkdocır u makthabzabnayda lu doro da 18 xıd remzo tawdithoyo Mşihoyo dıksohıd hul ucdo li ithutho dkıtwole u camaydan b’gawıd di qrithathe.

I cito d’Mor Codişo bi qritho d’Nasira hul ucdo lımethro mu kyono wa şemce kmitaqithi eba kul yawme d’huşabo. A’Yezidoye dcayişi bi qrithathe nafiqi moro li cito d’Mor Codişo u ftıhlın u tarcayda lo balhude lu camaydan, elo la Yezidoyeste dkımqadmila xıd bayto ma bote d’Aloho u remzo di ciyeşe bayn da tawdiyotho.

U mgabyo di qritho d’Nasira Narmo Xayyo dkıtyo farsufo Yezidoyo u dcayış i teşcitho di citathe, bi maqırhonutho dhule lu ajans da tebe d’Şafaq News mırle “a’Mşihoye trelın i qrithathe, u ahna kmandıfina i cito, kımhathıthinala u kmaqthina eba şemce kul yawme d’huşabo. Wa Yezidoyeste ksaymi socurutho li cito laşan dmaydi boruktho mena”.

Camgabıdathe, u hfito mdinoyo Yezidoyo Nawzad Hasan bi maqırhonutho dhule l’Şafaq News mahkele calu makthabzabno di cito d’Mor Codişo u mırle “i citathe mşatso i şato da na’1880, ubi şato da na’1956 athina li qritho d’Nasira u hzewola i cito bnitho eba. Ahna xıd Yezidoye kmawdena bi qadişutho di citathe cal dkımmathlo nuqazto di tawditho Mşihoyto”. Cala socurwotho dıksamla u camaydan wa Yezidoye li cito d’Mor Codişo, u hfito Yezidoyo hawxa mırle “i şato da 2014 meqım mıdmıkboşo i daşto d’Ninwe mu tukoso marıhbono dı Dacış, a’Mşihoye di daşto d’Ninwe ksaymiwo socurwotho li cito, elo bıthır mu kboşo umu huroro di daşto i şato da 2016 kalın a’socurwotho da Mşihoye”.

Bebzabno, u hfito Yezidoye mawdacle du camayde kmıştawtafwo camu camaydan ba slawotho u tekse citonoye dilonoye dıkmisomiwo bi cito d’Mor Codişo bi qritho d’Nasira.

Check Also

YPG maglela cali hiyoyutho da Sohde dmahrawla Turkiya wa marhıbonayda a bethqburathe b’Cafrin

Bi maqırhonutho dıfrıslın a Haylawotho du sutoro du Camo-YPG, maglelın cali hiyoyutho da S…