İ claymutho Suryoyto di daşto d’Ninwe mtayabla ramşitho ruhonoyto bi dayro d’Mor Matta

İ claymutho Suryoyto du camaydan di daşto d’Ninwe, mtayabla ramşitho ruhonoyto bi dayro d’Mor Matta zadiqo bu turo d’Almaqlub bu garbiyo du Iraq.

M’gabo hreno, bi mditho Suryoyto d’Bağdede di daşto d’Ninwe sim u futoho d’şuqo di mcadronutho da kawiye du sartono du canser.

Bi rocyutho du rişono di marcitho d’Mawsal, d’Kerxıslox udu qlimo d’Kurdistan di cito Suryoyto Ortodoksoyto Mor Niqodimos Dawud Matti Şaraf, i claymutho Suryoyto du şutoso dıkqore ruhe “u lqoyo da n’abne du şlomo”, mtayabla ramşitho ruhonoyto udi fsihutho bi dayro d’Mor Matta zadiqo bu turo d’Almaqlub bi daşto d’Ninwe.

Li ramşithathe mıştawtafle zıd m’60 clayme u calymotho Suryoye ma mdinotho u qıryawotho mşahılfe du camaydan di daşto d’Ninwe. Bebzabno, i claymutho mıştawtafla ste lu qurobo alohoyo dımrayşanle hasyo Mor Niqodimos.

İ ramşithathe dımtaybo bu ışmo “laltah du telolayde rayıgli d’yotawno” mıştawtaflela ste u rişono di dayro d’Mor Matta Mor Timothawos Musa Alşamani u tre dayroye di cito Suryoyto.

Hasyo Mor Niqodimos bu mamlo dsımle, mawdacle di claymutho u dactid di citone, u tlıble menaye dhowın masre camu cafro da n’abohothaththe dıfrıslın i Mşihoyutho bı Bethnahrin.

Bu huthomo di ramşitho, a’hsayo, a’dayroye wi claymutho mıştawtaflın lıhdo teblitho du muklo.

Mxasra hreto, u grub di marcitho d’Mor Fransis di cito Suryoyto Qatholiqoyto mtayable bi mditho d’Bağdede bi daşto d’Ninwe, şuqo di mcadronutho da kayiwe du sartono du canser.

İ şuqathe sim u futohayda mu kohno du grub qaşişo Durayd Barbar, u mıştawtaflela menyono d’amnore u gude du zmoro d’Bağdede, bnişo dımqadmi snodo li tarmithathe i noşoyto.

Bi şuqathe dsim u futohayda tlotho bu yarhano, kmizabın şuğlone d ido, msebıh, warde u syome hrene da naqşat. A’zuze dgıdmitaltımi mu zebono da amne di şuqo, gıdmitahwın la kayiwe du sartono du camaydan, bnişo dmicadri dşıqli darmone lu celojaththe.